SuperAngkor News | Cambodia News | Khmer News | World News | News | Health | Technoloy | Star | Travel

ភ្នែកមីញ៉ូបជាអ្វី?
ភ្នែកមីញ៉ូបជាលក្ខណៈរបស់ភ្នែកដែលមិនអាចមើលឆ្ងាយបាន ច្បាស់លាស់ ពោលគឺមើលទៅព្រិលៗ ដោយសារកាំពន្លឺ ឬកំណុំរូបភាពនៅផ្តុំគ្នានៅខាងមុខនៃសរសៃរ៉េទីនរបស់ភ្នែក។ រោគសញ្ញាភ្នែកមីញ៉ូបជាធម្មតាភ្នែកយើងមានប្រវែងប្រហែលពី២៣ទៅ ២៤មីលីម៉េត្រ បើភ្នែកមានប្រវែង វែងជាងនេះវាជាសញ្ញាណនៃភ្នែកមីញ៉ូបហើយ។ ក្រៅពីនោះក៏មានរោគសញ្ញាផ្សេងទៀតដូចជា៖

-មើលឆ្ងាយមិនច្បាស់ ប៉ុន្តែមើលជិតច្បាស់
-ធ្វើភ្នែកព្រិមៗពេលសម្លឹងមើលវត្ថុដែលនៅឆ្ងាយ ដោយភាពស្រវ៉ាំង
-កាន់សៀវភៅអាននៅជិតភ្នែក
-ចាញ់ពន្លឺ
-ចុករោយគ្រាប់ភ្នែកក្តៅភ្នែកហៀរទឹកភ្នែកជាញឹកញាប់
-ឈឺក្បាល ចុករោយគ្រាប់ភ្នែកនៅពេលប្រើប្រាស់ភ្នែកច្រើន ដូចជាការអានសៀវភៅ ឬប្រើប្រាស់កុំព្យូទ័រជាដើម។
មូលហេតុដែលបង្កឲ្យភ្នែកមីញ៉ូប
-ភ្នែកខ្លះមីញ៉ូបគឺបណ្តាលមកពីកែវភ្នែកធម្មជាតិ ដែលតម្រូវឲ្យកើតមានតែម្តង
-មកពីទំហំភ្នែកវែងជាងភ្នែកធម្មតា (ភ្នែកធម្មតាមានប្រវែងប្រហាក់ប្រហែលពី២៣ទៅ២៤មីលីម៉ែត្រ)
-មើលច្រើន ឬសម្លឹងរយៈពេលយូរ ក្នុងរយៈពេលដ៏វែងណាមួយ
-ភ្នែកភាគច្រើនសម្លឹងមើលជិតៗ
-ភ្នែកមីញ៉ូបក៏បណ្តាលមកពីកត្តាដំណពូជផងដែរ។

ភ្នែកមានសារសំខាន់ណាស់សម្រាប់មនុស្ស គ្រប់រូបក្នុងការរស់នៅប្រចាំថ្ងៃ។ ជាការកត់សម្គាល់មនុស្សមួយចំនួន មិនបានយកចិត្តទុកដាក់ថែរក្សាភ្នែកទេ គឺចេះតែប្រើប្រាស់ភ្នែកមិនបានល្អ ធ្វើឲ្យកើតបញ្ហាផ្សេង។ មានបញ្ហាជាច្រើនដែលពាក់ព័ន្ធនឹងភ្នែកនៅក្នុងនោះបញ្ហាភ្នែកមីញ៉ូ ប ក៏ជាបញ្ហាប្រឈមរបស់មនុស្សនាសម័យទំនើបនេះផងដែរ។

ពីព្រោះសម័យទំនើបមានប្រព័ន្ធបច្ចេកវិទ្យាជឿនលឿន ដែលមនុស្សត្រូវតែមើលដើម្បីសិក្សាទទួលបានព័ត៌មានតាម រយៈការមើល ទូរទស្សន៍ កុំព្យូទ័រ និងទូរសព្ទដៃ។ ការមើលនៅក្នុងរយៈពេលយូរ និងមើលជិតពេកលុះយូរៗ ទៅរហូតដល់ធ្វើឲ្យប៉ះពាល់ដល់ភ្នែកនិងធ្វើឲ្យភ្នែកក្លាយជា មីញ៉ូប។

វិធីព្យាបាលភ្នែកមីញ៉ូប
បើតាមអ្នកជំនាញដែលបានបកស្រាយ ភ្នែកមីញ៉ូបពិតជាពិបាកនឹងព្យាបានឲ្យជាសះស្បើយខ្លាំងណាស់ ប៉ុន្តែអាចប្រើប្រាស់វ៉ែនតាអាចប្រើប្រាស់ខនថិកឡែនជាជំនួយហើយ បើភ្នែកមីញ៉ូបធ្ងន់ធ្ងរត្រូវធ្វើការវះកាត់។

១-ការប្រើប្រាស់វ៉ែនតា : ការប្រើប្រាស់វ៉ែនតាបានផ្តល់អត្ថប្រយោជន៍ច្រើនគួរសមដែរ វាអាចជួយឲ្យភ្នែកមើល ឃើញវត្ថុតូចៗដែលនៅជិត។ មើលទៅឆ្ងាយបានច្បាស់ជារួមធ្វើឲ្យមើលឃើញប្រសើរជាងមុន។ ការប្រើប្រាស់វ៉ែនតា តាមរយៈការវាស់ភ្នែកដោយលក្ខណៈត្រឹមត្រូវ នោះនិងមិនប៉ះពាល់ដោយផ្ទាល់ទៅនិងភ្នែកនោះទេ។

២-ការព្យាបាលភ្នែកតាមរយៈការប្រើប្រាស់ខនថិកឡែន : ខនថិកឡែន ឬហៅម្យ៉ាងទៀតថាកែវបិទលើកញ្ចក់ភ្នែកគឺជាប្រភេទជាតិជ័រទន់ស្តើង ម្យ៉ាងដែលគេផលិត ឡើងសម្រាប់បិទដាក់លើកញ្ចក់ភ្នែកដោយផ្ទាល់។ ការដាក់ខនថិកឡែនក្នុងភ្នែកវាមានប្រយោជន៍សម្រាប់អ្នកដែលមាន ការខ្មាស់អៀន ដោយខ្លាចគេដឹងថាខ្លួនកើតជំងឺភ្នែកមីញ៉ូប ពី ព្រោះការដាក់ខនថិកឡែនក្នុងភ្នែកមើលទៅដូចភ្នែកធម្មតាមិនមាន អ្វីគួរឲ្យកត់សម្គាល់ទេ។ ប៉ុន្តែសម្រាប់អ្នកដែលប្រើប្រាស់ខនថិកឡែនត្រូវមានអនាម័យខ្ពស់ នៅក្នុងការសម្អាត។

៣-តាមរយៈការវះកាត់ ឬបាញ់ឡាស៊ែរ : ប្រសិនបើភ្នែកមីញ៉ូបនោះមានកម្រិតធ្ងន់ធ្ងរ ត្រូវតែមកទទួលការព្យាបាលតាមរយៈការវះកាត់ ឬដោយការបាញ់កាំរស្មីឡាស៊ែរ។ ការព្យាបាលប្រភេទនេះត្រូវចំណាយប្រាក់ច្រើន និងត្រូវជ្រើសរើសអ្នកជំនាញដែលមានបទពិសោធន៍។ ជាទូទៅវិធីព្យាលបាលនេះទទួលបានលទ្ធផលល្អគួរកត់សំគាល់។

វិធីបង្កាភ្នែកមីញ៉ូប
សម្រាប់វិធីបង្កាភ្នែកមីញ៉ូបយើងមានវិធីមួយចំនួន សម្រាប់ការពារភ្នែកលោកអ្នកក៏ដូចជាកូនៗលោកអ្នក កុំឲ្យមានផលប៉ះពាល់ដល់ភ្នែក៖
-ត្រូវយកកុមារតូចៗមុនចូលសាលាមកពិនិត្យភ្នែក និងកុំបណ្តោយឲ្យកុមារមើលទូរទស្សន៍នៅជិតពេក។ ពាក់ព័ន្ធនិងភ្នែកមីញ៉ូបដែលកើតលើក្មេងៗនេះដែរ បើតាមការសិក្សារបស់សកលវិទ្យាល័យ Cambridge ប្រទេសអង់គ្លេសដោយលោកJustin Sherwinបានរកឃើញថា បញ្ហាភ្នែកមីញ៉ូបកើតលើក្មេងៗ ជាពិសេសក្មេងៗដែលនៅក្នុងទីក្រុងធំៗតែម្តង ក្នុងនោះទីក្រុងភ្នំពេញក៏មានក្មេងៗដែលមីញ៉ូបភ្នែកកើនទ្បើង ច្រើនដែរ ជាពិសេសសិស្សសាលា។ ពី ព្រោះនៅក្នុងទីក្រុងក្មេងៗភាគច្រើនមិនសូវជាចេញទៅក្រៅប៉ុន្មាន ទេ ហើយភាគច្រើនគេចំណាយពេលនៅក្នុងផ្ទះ ឬនៅបន្ទប់រៀន។

ប៉ុន្តែបើយើងក្រលេកមើលក្មេងៗនៅតាមទីជនបទវិញ គឺក្មេងៗមិនសូវមានជំងឺមីញ៉ូបភ្នែកកើនទ្បើងច្រើនទេពីព្រោះក្មេង នៅជនបទ ពួកគេចំណាយពេលច្រើននៅទីវាល។ ការសិក្សានេះបានពន្យល់ថាកាលណាក្មេងៗមើលទៅវត្ថុទាំងទ្បាយណាដែល មានចំងាយឆ្ងាយពីភ្នែក ក្មេងនោះនឹងអាចកាត់បន្ថយជំងឺមីញ៉ូបភ្នែកបាន។

បើយើងគិតឲ្យបានស៊ីជម្រៅយើងនឹងឃើញថា កាលណាក្មេងនៅក្នុងផ្ទះច្រើន ភ្នែករបស់ពួកគេនឹងទទួលបានពន្លឺមិនគ្រប់គ្រាន់។ ដូចនេះពួកគេអាចមើលរបស់ផ្សេងៗស្រវ៉ាំងមិនច្បាស់ ហើយកាលណាលពួកគេនៅក្នុងផ្ទះច្រើន គឺវាអាចមើលទូរទស្សន៍ច្រើន ឬក៏ប្រើកុំព្យូទ័រច្រើន ឬក៏ប្រើប្រាស់ទូរសព្ទទំនើបច្រើនម៉ោង។ ដែលកត្តាទាំងនេះសុទ្ធតែអាចធ្វើឲ្យភ្នែករបស់ក្មេងៗទាំងនោះអាច នឹងឆាប់ខូចភ្នែក ហើយក្លាយជាមីញ៉ូម។ ដូចនេះយើងគួរឲ្យក្មេងនៅខាង ក្រៅផ្ទះឲ្យបានច្រើន ជាពិសេសនៅពេលថ្ងៃដើម្បីឲ្យភ្នែករបស់ពួកគេទទួលពន្លឺធម្ម ជាតិ ក្នុងកំរឹតសមស្របណាមួយ។ ត្រូវចងចាំថាពន្លឺថ្ងៃអាចធ្វើឲ្យក្មេងមានជំងឺមហារីកស្បែកបាន។

-ម្តាយគួរតែបំបៅកូនដោយទឹកដោះ ពីព្រោះទឹកដោះម្តាយមានគុណប្រយោជន៍ច្រើនណាស់ ដល់ទារករហូតដល់ពេញវ័យក្រៅពីជួយសាងប្រព័ន្ឋការពាររាងកាយរឹងមាំ ដល់កូនរបស់អ្នកហើយនោះតាមការស្រាវជ្រាវបានរកឃើញ ថា ថែមទាំងជួយឲ្យកូនៗរបស់អ្នកមិនក្លាយជាក្មេងខ្សែភ្នែកខ្លី ដែលជាសញ្ញាណនៃភ្នែកមីញ៉ូប។

គួរបញ្ជាក់ដែរថា ក្នុងទឹកដោះម្តាយមានសារធាតុDocosahexaenoic Acid/DHAដែលមានភាពសំខាន់ ចំពោះការលូតលាស់របស់ខួរក្បាលនិងភ្នែក។ ប្រសិនបើកូនតូចបានបៅទឹកដោះម្តាយ នឹងជួយឲ្យការលូតលាស់របស់ផ្នែកចក្ខុប្រសាទល្អប្រសើរឡើង ។ ក្មេងភ្នែកមីញ៉ូបភាគច្រើន ជាក្មេងដែលមិនបានបៅទឹកដោះម្តាងតាំងពីកើត ហើយកុមារដែលបៅទឹកដោះម្តាយ តាំងពីកើតមកនោះ រកឃើញថាមានបញ្ហាភ្នែកមីញ៉ូបតិចណាស់។

-មិនត្រូវអានសៀវភៅក្នុងបរិយាកាសមិនល្អ ដូចជាពន្លឺខ្សោយពេកឬតិចពេក

-បើលោកអ្នកមើលឆ្ងាយឃើញព្រិលៗ មិនច្បាស់ល្អត្រូវតែទៅពិគ្រោះជាមួយអ្នកឯកទេសភ្នែក៕