SuperAngkor News | Cambodia News | Khmer News | World News | News | Health | Technoloy | Star | Travel

រឿងរ៉ាវបង្កប់ក្រោយរូបថតមនុស្សមានសក់បះត្រង់ទៅលើបានទម្លាយសញ្ញាមួយជួយឲ្យយើងដឹងពីមុខសញ្ញាជិតត្រូវរន្ទះបាញ់ ។ ទីភ្នាក់ងារពត៌មាន NBC ចុះផ្សាយថា John Jensenius ជំនាញការសុវត្ថិភាពអំពីរន្ទះនៅនាយកដ្ឋាន គ្រប់គ្រងមហាសាគរ និងស្រទាប់ចក្រវាឡជាតិអាមេរិក (NOAA) ទើបនឹងចុះផ្សាយកំណត់ត្រា របស់បុរសម្នាក់មានឈ្មោះ Mc Quilken អំពីថ្ងៃជោគវាសនា ២៨/៨/១៩៧៥ ។

លោក Mc Quilken បច្ចុប្បនមានអាយុ៥៦ឆ្នាំ រៀបរាប់ថា លោកធ្លាប់ដើរឡើងកំពូលភ្នំ Moro Rock ក្នុងឧទ្យាន ជាតិនៅកាលីហ្វ័រញ៉ាជាមួយប្អូនប្រុស២នាក់ Sean និង Jeff និងប្អូនស្រី Mary និងមិត្តស្រីម្នាក់ឈ្មោះ Margie ។ កាំរន្ទះបង្កើតជារូបភាពដ៏អស្ចារ្យលើមេឃ តែបង្កប់នូវគ្រោះថ្នាក់សម្លាប់មនុស្សលើកំពូលភ្នំ ក្រុមរបស់ Mc Quilken សង្កេត ឃើញធាតុអាកាសកំពុងអាក្រក់ទៅ ហើយសក់របស់ពួកគេចាប់ផ្តើមបះត្រង់ខុសប្រក្រតី រឿងដែលអ្នកទាំងអស់គ្នាពេលនោះសុទ្ធតែចាត់ទុកគួរឲ្យអស់សំណើច ។

Marg ពេលនោះអាយុ១៥ឆ្នាំ បានថតរូបភាពមួយចំនួនអំពីបាតុភូតនេះ និងមិនដឹងថា វាប្រែជាល្បីឈ្មោះ ។ Mc Quilken រំលឹកថា គ្រាលនោះពេលលោកលើកដៃស្តាំឡើងលើ ចិញ្ចៀនដែលកំពុងពាក់ចាប់ផ្តើមបញ្ចេញស្នូរខ្លាំងៗដល់កម្រិតនរណាក៏អាចស្តាប់ឮ ។ ក្រុមក្មេងៗមិនបានដឹងថា "សញ្ញាអំពីផ្ទៃ" ដូចនេះក្នុងបរិយាកាស ជាសញ្ញាព្រមានត្រូវរកកន្លែងជ្រកលាក់ខ្លួនមួយរំពេច ។ ពួកគេចាកចេញពីកំពូលភ្នំ តែពេលសីតុណ្ហភាពធ្លាក់ចុះ ហើយមេឃចាប់ផ្តើមភ្លៀងទឹកកក ។ ប៉ុន្តែពួកគេដើរមិនបានឆ្ងាយឡើយមុនពេលគ្រោះមហន្តរាយកើតឡើង ។

Mc Quilken បច្ចុប្បន្នជាវិស្វករផ្នែកទន់ ពណ៌នាថា នៅពេលរន្ទះបាញ់ ពេលវេលាហាក់ដូចយឺតមកវិញ ពន្លឺភ្លឺច្រាលលេចឡើងរួមជាមួយអារម្មណ៍គ្មានទម្ងន់ និងស្នូរផ្ទុះមួយហ៊ឹងត្រចៀក ។ ពេលដឹងខ្លួនឡើវិញលើផ្ទៃដី Mc Quilken ឃើញប្អូនប្រុស Sean ត្រូវរន្ទះបាញ់ដួលសន្លប់ ផ្សែងហុយចេញពីខ្នងគេ ។ Mc Quilken ប្រញាប់រត់ទៅដល់កន្លែងប្អូនប្រុស និងត្រួតពិនិត្យដង្កើមក៏ដូចជីពចររបស់គេ ។ សំណាងណាស់ដែល Sean នៅរស់ហើយអ្នកផ្សេងទៀតក្នុងក្រុមបាននាំគេត្រឡប់ទៅកន្លែងចតរថយន្តចេញដំណើរ ទៅកាន់មន្ទីរពេទ្យសង្គ្រោះបន្ទាន់ទាន់ពេល ។ Sean ត្រូវរលាកកម្រិត៣ នៅខ្នង និងកួយដៃ តែសំណាងនៅមានជីវិតដោយសារមិនប៉ះដីទាំងស្រុងពេលត្រូវរន្ទះបាញ់ ។

ថ្វីត្បិតដូច្នេះ បុរសម្នាក់ក៏ត្រូវរន្ទះបាញ់ នៅជិតនោះមិនបានឆ្លងផុតពីសេចក្តីស្លាប់ ដោយសារស្នាមរលាកតូច១នៅជិតបេះដូង ។ បុរសម្នាក់ផ្សេងទៀតនៅជិតកំពូលភ្នំ និងត្រូវរន្ទះបាញ់នៅពេលនោះបានសន្លប់ និងមិនដឹងខ្លួនឡើងវិញ ប្រមាណ៦ខែបន្ទាប់ពីនោះទោះបីនៅមានជីវិត ។

Mc Quilken និយាយលេងថា លោកនិងប្អូនប្រុសមិនទទួលបានថាមពលអភិធម្មជាតិណាក្រោយពេលត្រូវរន្ទះបាញ់ ។ ប៉ុន្តែ ពួកគេបានដឹងពីសារសំខាន់អំពីការរកឃើញកត្តាហានិភ័យក៏ដូចចេះប្រយ័ត្នប្រយែងពេលឡើងលើកំពូលភ្នំណានោះពេលមេឃមានសញ្ញាព្យុះភ្លៀង ។ ដូចការបញ្ជាក់ក្នុងរឿងរ៉ាវ NOAA ទូន្មានថា ប្រសិនសក់របស់អ្នកត្រូវបះឈរពេលកំពុងមានវត្តមានលើកំពូលភ្នំ ឬ ទួល ចូររកកន្លែងជ្រកពួនភ្លាមមួយរំពេចព្រោះអ្នកមានការប្រឈមត្រូវរន្ទះបាញ់ ៕