អិនចុចពិលអភិវឌ្ឍន៍ថ្មី Nokia ១០៥ មកដល់កម្ពុជាឆាប់ៗនេះ
April 08, 2013 (10:59:22)
[ 1459 ]
ក្រុមហ៊ុន Nokia ប្រចាំនៅប្រទេសកម្ពុជាបានបង្ហើបឱ្យដឹងថា ទូរស័ព្ទ Nokia 105 ដែលជាទូរស័ព្ទដៃម៉ូដែលថ្មីបំផុតរបស់ Nokia នឹងត្រូវដាក់លក់លើទីផ្សារកម្ពុជាបន្ទាប់ពីចូលឆ្នាំខ្មែររួច ។ ទូរស័ព្ទថ្មីនេះមាន២ពណ៌សម្រាប់ជ្រើសរើស គឺពណ៌ខ្មៅនិងពណ៌ខៀវស្រាល ហើយថែមទាំងមានអេក្រង់ពណ៌ធម្មជាតិទៀតផង ។
Nokia 105 គឺជាទូរស័ព្ទថ្មីជំនាន់ក្រោយនៃ Nokia 1280 (ឬហៅតាមចំណាំនៅប្រទេសកម្ពុជាថា N ចុចពិល) ដែលមកទល់នឹងពេលនេះ លក់ដាច់អស់ជាងមួយរយលានគ្រឿងនៅទូទាំងពិភពលោក ។ ទូរស័ព្ទស៊េរីថ្មី Nokia 105 នេះមានគុណភាពខ្ពស់ រចនាស្រស់ស្អាត និងមានបំពាក់ឧបករណ៍ដែលអ្នកប្រើប្រាស់ត្រូវការប្រចាំថ្ងៃដូចជា វិទ្យុអេហ្វអឹម នាឡិកាសំឡេង និងពិលជាដើម ។ ក្រៅពីនេះ Nokia 105 មានប៊ូតុងមិនចូលធូលី និងមិនជ្រាបទឹក ចំណែកថ្មវិញអាចកាន់ភ្លើងបានដល់ទៅជាងមួយខែ ។ សម្រាប់អ្នកប្រើប្រាស់ស្មាតហ្វូន, Nokia 105 ជាទូរស័ព្ទបម្រុងដ៏ប្រសើរបំផុត ៕