SuperAngkor News | Cambodia News | Khmer News | World News | News | Health | Technoloy | Star | Travel

អស់រយៈពេលជាច្រើន សប្តាហ៍មកហើយ ដែលពិធីការិនី គង់ សុជាតិ បង្ហាញវត្តមាន នៅទូរទស្សន៍ MYTV ក្នុងកម្មវិធី «ហាមសើច» ចាប់ដៃគូជាមួយលោកទុយ ។ តាមរយៈការបញ្ចូលខ្លួន ជាសមាជិកការងារនៅកន្លែងថ្មី ធ្វើឱ្យអ្នកតាមដានជីវិតសិល្បៈ របស់ពិធីការិនីយូរឆ្នាំរូបនេះ លើកឡើងថា តើនាងអាចនឹងបោះបង់ប៉ុស្តិ៍លេខ៣ ដែលបម្រើការងារយូរមកហើយនោះ ឬយ៉ាងណា ?

មហាជនដែលនិយមតាមដាន កម្មវិធីមួយចំនួនរបស់ទូរទស្សន៍ MYTV ច្បាស់ជាមានអារម្មណ៍ថា ប្លែកខ្លាំងមែនទែន ព្រោះក្នុងឆ្នាំ២០១៣នេះ MYTV បានផ្លាស់ប្តូរទម្រង់កម្មវិធីជាច្រើន ដើម្បីឱ្យមហាជនបានប្លែកភ្នែក ពិសេសមានកម្មវិធីបែបកម្សាន្ត សើចសប្បាយសម្បូរបែបជាច្រើន ។ លើសពីនេះក្រៅពីមានកម្មវិធីថ្មី ក៏គេចាប់អារម្មណ៍ឃើញមាន តារាលំដាប់ជួរមុខជាច្រើនទៀត នាំគ្នាចូលទៅកាន់តួនាទី ជាពិធីករ-ពិធីការិនី ដែលភាគច្រើនមានបុគ្គលិក ចេញពីទូរទស្សន៍ប៉ុស្តិ៍លេខ៣ មានវត្តមានព្រមគ្នាដូចជា អ្នកនាង គង់ សុជាតិ, អ្នកនាង មាស ម៉ូលីណា និង លោក យឹម ណារ៉ា ជាដើម ។ អ៊ីចឹងហើយ ទើបគេគិតថា តារាទាំងនោះអាចមានអ្នកខ្លះដាច់ការងារពីកន្លែងចាស់ទាំងស្រុង ពិសេសអ្នកនាង គង់ សុជាតិ ដែលមុននេះគ្រាន់តែធ្វើជាតារាកិត្តិយសនៅទីនោះ ស្រាប់តែក្លាយជាពិធីការិនីប្រចាំ MYTV ហើយមានមុខចេញជារៀងរាល់អាទិត្យយ៉ាងទៀងទាត់ ។

ក្នុងជំនួបមួយនៅប៉ុស្តិ៍លេខ៣ ក្នុងកម្មវិធី «តារាឯក» កាលពីថ្ងៃអាទិត្យ ទី១៤ កក្កដា ២០១៣ អ្នកនាង គង់ សុជាតិ ដែលនៅតែមានគេសង្ស័យមានសម្ព័ន្ធស្នេហាជាមួយលោក ជា វិបុល ជាដៃគូពិធីករនោះបានប្រាប់ថា ទោះជាលោតទៅចេញមុខនៅកន្លែងថ្មី តែនាងមិនជាប់កិច្ចសន្យាទេ ពោលគឺនៅតែបម្រើការនៅទូរទស្សន៍ប៉ុស្តិ៍លេខ៣ដដែល មិនបោះបង់ចោលទៅណាទេ ព្រោះកន្លែងចាស់មានអនុស្សាវរីយ៍ច្រើន ឱ្យឈប់ដាច់គឺមិនអាចទេ ។ នៅ MYTV មានគេហៅឱ្យកាន់កម្មវិធីចំនួន២ទៀត តែនាងមិនធ្វើព្រោះអត់មានពេល ហើយមកពីនាងមមាញឹកទាំងសិល្បៈ និងមុខរបរផ្ទាល់ខ្លួន ទើបមិនអាចឈោងចាប់ការងារថ្មីលើសពីកម្លាំងទេ ពោលធ្វើបានប៉ុនណាយកប៉ុណ្ណឹង ។

ម៉្យាងនាងមិនចង់ដណ្តើមការងារជាមួយអ្នកស្រករក្រោយច្រើនពេកទេ ទុកឱកាសឱ្យគេខ្លះ ។ ក្រៅពី MYTV នៅមានទូរទស្សន៍ហង្សមាសទៀត ដែលអ្នកនាង គង់ សុជាតិ មានវត្តមាន តែមិនអចិន្ត្រៃយ៍ទេ ភាគច្រើនជាការងារក្រុមហ៊ុនឯកជនរៀបចំ ហើយខាងស្ថានីយទូរទស្សន៍ទាក់ទង ដូច្នេះចេះតែធ្វើ ។ ពិធីការិនីយូរឆ្នាំរូបនេះនិយាយថា «បើឱ្យឆ្លេឆ្លាទៅកាន់កន្លែងថ្មី គឺអត់ទេ អត់ចោលប៉ុស្តិ៍លេខ៣ឡើយ» ។

អ្នកនាង គង់ សុជាតិ ចាប់អារម្មណ៍នឹងការងាររបស់តារា ថ្មីៗថា «ពួកគេមានការកើនឡើងខាងសមត្ថភាព ហ៊ានសម្តែង ហ៊ានធ្វើ និងខ្លះមានជំនាញច្រើនទៀត ដែលនេះជាភាពឈានឡើងនៃអ្នកសិល្បៈ ។ ដូចនេះគួរតែ ប្អូនៗខិតខំពង្រឹងខ្លួនធ្វើយ៉ាងណាធ្វើជាតារាល្អ ជាគំរូ គោរពពេលវេលាការងារ ព្រោះគ្មានអ្នកណាជួយយើងក្រៅពីខ្លួនឯងទេ បើចង់ឱ្យគេយឹតយោង ទាល់តែចេះប្រឹងខ្លួនឯងសិន» ។ ទាក់ទិននឹងជីវិតស្នេហាដែលអ្នកនាង គង់ សុជាតិ តែងតែធុញថប់បកស្រាយនោះបានអះអាងខ្លីថា នាងគ្មានអ្នកថ្មីទេ ហើយមិនចង់និយាយរឿងផ្ទាល់ខ្លួនក្រៅពីការងារ ថ្មីៗក្នុងសិល្បៈ និងមុខរបររកស៊ី ៕