SuperAngkor News | Cambodia News | Khmer News | World News | News | Health | Technoloy | Star | Travel

កំពូលតារាចម្រៀង លោក ខេមរៈ សិរីមន្ត បានត្រូវម្ចាស់ស្ពុនស័រ អញ្ជើញឲ្យទៅចូលរួមសម្តែង និងច្រៀង នៅក្នុងប្រទេសចំនួន៤ មានដូចជា សហរដ្ឋអាមរិក កាណាដា បារាំង និងអូស្រា្តលី ប៉ុន្តែការអញ្ជើញទាំងនោះ ត្រូវបរាជ័យទាំងស្រុង ដោយសារកំពូលរារាចម្រៀងដ៏ល្បីរូបនេះ បានបដិសេធ ដោយមូលហេតុជាប់កិច្ចសន្យាច្រើន ពេក ជាមួយបណ្តាក្រុមហ៊ុននៅក្នុងស្រុក ។

តាមរយៈកិច្ចសម្ភាសន៍ ជាមួយគេហទំព័រ CEN តារាចម្រៀងជួរមុខរបស់ផលិតកម្មសាន់ដេ លោក ខេមរៈ សិរីមន្ត បានធ្វើការបកស្រាយថា ដោយឈរលើហេតុផលការងារមមាញឹក នៅក្នុងស្រុកច្រើនពេក ទើបធ្វើអោយលោកសម្រេចចិត្តបដិសេធ ចោលនូវគម្រោងចេញទៅច្រៀង នៅក្រៅស្រុក តាមការស្នើសុំ ។

តារាចម្រៀងមានឥទ្ធិពល នៅក្នុងផលិតកម្មសាន់ដេរូបនេះ អះអាងថា ប្រទេសចំនួន៤ មាន កាណាដា បារាំង អូស្រា្តលី និងសហរដ្ឋអាមេរិក បានធ្វើការទំនាក់ទំនង អញ្ជើញរូបលោក ចេញទៅច្រៀង នៅចុងឆ្នាំ២០១៣នេះ ប៉ុន្តែដោយសារតែលោក ជាប់កុងត្រា ក្នុងការចេញទៅច្រៀង នៅតាមបណ្តាខេត្តនានា អោយក្រុមហ៊ុនក្នុងស្រុកជាច្រើននោះ ទើបមិនអាចបំពេញតាមសំណូមពររបស់គេបាន ។

តារាចម្រៀង មានប្រជាប្រិយភាពខ្ពស់ ក្នុងស្រទាប់យុវវ័យ លោក ខេមរៈ សិរីមន្ត បានបញ្ជាក់ថាៈ " ឆ្នាំនេះ លោកមិនអាចចេញទៅច្រៀង នៅក្រៅប្រទេសបានទេ ព្រោះការងារនៅក្នុងស្រុក កំពុងតែមមាញឹក រកពេលសម្រាកគ្មាន " ។ លោកបន្ថែមថាៈ " ប្រហែលជានៅឆ្នាំ២០១៥-២០១៦ ទើបអាចទៅបាន ដូច្នេះស្នើសុំម្ចាស់ស្ពុនស័រ មេត្តាយោគយល់ "។

លោក ខេមរៈ សិរីមន្ត បានចាត់ទុកថា ឆ្នាំនេះ ដូចជាប្លែក ព្រោះមានការងារធ្វើច្រើនជាងបណ្តាឆ្នាំមុនៗ ។ ក្រុមហ៊ុនជាច្រើនបានចាប់អារម្មណ៍មកលើរូបលោកខ្លាំង តាមរយៈទំនាក់ទំនងជាបន្តបន្ទាប់ ក្នុងនោះ មានការងារខ្លះ កំពុងតែចុះកុងត្រា ការងារខ្លះកំពុងបន្តកុងត្រា និងការងារខ្លះទៀត កំពុងតែទំនាក់ទំនងជាបណ្តើរៗ ។ ពាក់ព័ន្ធទៅនឹងការបង្ហាញវត្តមាន នៅក្នុងកម្មវិធីឆ្លងឆ្នាំសាកល នាថ្ងៃខាងមុខ ត្រូវបានលោក ខេមរៈ សិរីមន្ត ទម្លាយអោយដឹងថា ឆ្នាំនេះ លោកត្រូវទៅឆ្លងឆ្នាំ នៅឯខេត្ត សៀមរាប តបតាមការអញ្ជើញរបស់ក្រុមហ៊ុនធំមួយ ។

គួរបញ្ជាក់ថា ផ្តើមចេញពីភាពល្បីល្បាញ បានធ្វើអោយកំពូលតារាចម្រៀង លោក ខេមរៈ សិរីមន្ត ក្លាយជាគោលដៅ ចង់បានរបស់បណ្តាក្រុមហ៊ុនជាច្រើន ក៏ដូចជាម្ចាស់ស្ពុនស័រនានា។ ជាមួយនឹងការបង្ហាញវត្តមាន ក្នុងកម្មវិធីធំៗជា ច្រើននោះ បានធ្វើ អោយប្រជាប្រិយភាព ក៏ដូចជា ប្រាក់ចំណូលរបស់តារាចម្រៀងរូបនេះ ហក់ឡើងកាន់ តែខ្ពស់ គួរអោយកត់សម្គាល់ ៕