SuperAngkor News | Cambodia News | Khmer News | World News | News | Health | Technoloy | Star | Travel

ខ្សែភាពយន្តភាគរឿង “ សន្យាស្នេហ៍ ” របស់ផលិតកម្មខ្មែរមេគង្គ ដែលកំពុងដាក់បញ្ចាំង អោយទស្សនិក ជនទស្សនាជាប្រចាំ នៅលើកញ្ចក់ទូរទស្សន៍ MY TV គ្រោងនឹងថតបញ្ចប់ នូវខ្សែរឿងចុងក្រោយរបស់ខ្លួនក្នុងពេលឆាប់ៗ ខាងមុខនេះហើយ ដោយក្នុងនោះ ត្រូវបង្ខំចិត្តថតបញ្ចប់ក្រោមអវត្តមាន តួឯកស្រីសំខាន់គឺនាង នី មុន្នីនាថ ។

យោងតាមប្រភព បានអោយដឹងថា ដោយសារតែខ្សែភាពយន្តរឿង “ សន្យាស្នេហ៍ ” ត្រូវបានភាគីខាងទូរទស្សន៍តម្រូវអោយធ្វើការចាក់ផ្សាយបណ្តើរ និងថតបណ្តើរ ហើយដោយ សារតែនៅក្នុងសាច់រឿង មានឈុតឆាក ភាគច្រើន ត្រូវសម្រិតសម្រាំងខ្លាំងពេក ទើបធ្វើអោយគម្រោងនៃការថត ត្រូវអូសបន្លាយ ដោយមិនអាចបញ្ចប់ ទៅតាមការគ្រោងទុក ។

ប្រភពបានបន្តថា ម្ចាស់ផលិតកម្មខ្មែរមេគង្គ បានបង្ខំចិត្តថតបញ្ចប់ ខ្សែរឿងភាគទូរទស្សន៍មួយនេះ មុនការកំណត់តែម្តង ដោយមិនអាចរង់ចាំដល់ថ្ងៃ នាង នី មុន្នីនាថ ត្រឡប់មកពីសហរដ្ឋអាមេរិកវិញឡើយ ព្រោះពេលវេលាមិនអំណោយផល ។

យ៉ាងណាក៏ដោយ ប្រភពបានអះអាងថា តួឯកស្រីថ្មី ដែលត្រូវចូលមកសម្តែងជំនួស នាង នី មុន្នីនាថ ដែលជាប់រវល់ចេញទៅសម្តែង នៅសហរដ្ឋអាមេរិកនោះ គឺតារាសម្តែងស្រី នាង ព្រះកាយច័ន្ទ ដោយការផ្លាស់ប្តូរនេះ គឺសម្រាប់តែតួឯកស្រី តែប៉ុណ្ណោះ ប៉ុន្តែនៅរក្សាសាច់រឿង និងឆ្អឹងរឿង អោយនៅដដែល។ ទន្ទឹមនោះ ការសម្រេចប្តូរតួ ក៏បានទទួលការឯកភាពទាំងស្រុង ពីថ្នាក់ដឹកនាំទូរទស្សន៍ MY TV ក៏ដូចជា អ្នកឧបត្ថម្ភកម្មវិធីផងដែរ ។

ពាក់ព័ន្ធនឹងបញ្ហានេះ ម្តាយរបស់នាង នី មុន្នីនាថ បានលើកឡើង តាមរយៈគេហទំព័រ CEN ថា វាគ្មានបញ្ហាអ្វីនោះទេ សម្រាប់ការផ្លាស់ប្តូរតួ ព្រោះយើងបានពិភាក្សា និងសម្រេចរួចរាល់ រួចហើយ រវាងកូនអ្នកស្រី និងភាគីផលិតកម្មខ្មែរមេគង្គ ។ លោកស្រី បានអះអាងថា ពួកយើងបានពិភាក្សា និងទទួលការយល់ព្រមទាំងសងខាង តាំងពី មុន្នីនាថ មិនទាន់ចាកចេញ ទៅសហរដ្ឋអាមេរិកម្ល៉េះ ។

ម្តាយរបស់តារាទឹកភ្នែកនាង នី មុន្នីនាថ បានបញ្ជាក់ថា " នេះមិនមែនជាកំហុសរបស់អានាថទេ ការផ្លាស់ប្តូរតួឯកស្រីនៅក្នុងខ្សែរឿង “ សន្យាស្នេហ៍ ” ដោយសារតែក្រុមហ៊ុន មិនមានពេលគ្រប់គ្រាន់ ក្នុងការរង់ចាំការវិលត្រឡប់ពីក្រៅ ប្រទេសរបស់អានាថ "។

យ៉ាងណាក៏ដោយ អ្នកស្រីបានសង្កត់ធ្ងន់ថា ទស្សនិកជន បានទទួលស្គាល់រួចហើយ នូវសមត្ថភាព ក៏ដូចជា ទេពកោសល្យនៃការសម្តែង ដ៏ប៉ិនប្រសព្វរបស់ មុន្នីនាថ នៅក្នុងខ្សែរឿង “សន្យាស្នេហ៍” ដែលបានចាក់ផ្សាយនៅលើកញ្ចក់ទូរទស្សន៍ នាពេលកន្លងមកនេះ ។ ទន្ទឹមនោះ ខ្សែរឿងមួយនេះ ក៏បានសម្រេចការថតរបស់ខ្លួន អស់ជាច្រើនភាគហើយដែរដោយនៅសេសសល់ តែចុងកន្ទុយបន្តិចតែប៉ុណ្ណោះ ។ ដូច្នេះវាមិនអាចបង្កជាបញ្ហា ឬទទួលការខាតបង់អ្វីធ្ងន់ធ្ងរនោះទេ សម្រាប់ការថតបញ្ចប់ខ្សែរឿង “ សន្យាស្នេហ៍ ” ដោយគ្មានវត្តមានរបស់ នី មុន្នីនាថ ៕