SuperAngkor News | Cambodia News | Khmer News | World News | News | Health | Technoloy | Star | Travel

ភ្នំពេញ: តារាចម្រៀងស្រស់ក្មេងរបស់ផលិតកម្មថោន សុគន្ធ ថេរ៉ាយុ កំពុងក្លាយខ្លួនជាម្ចាស់វីឡាមិនតិចជាងពីរ ខណៈ ដែលនៅសល់ប៉ុន្មានថ្ងៃខាងមុខនេះ តារាចម្រៀងសាច់ផូរផងរូបនេះ នឹងប្រារព្ធធ្វើពិធីរឡើងគេហដ្ឋានថ្មី ក្នុងតំលៃជិតកន្លះលានដុល្លារ។

តារាចម្រៀងវ័យក្មេងរូបនេះ ធ្លាប់ពើបប្រទះនឹងពត៌មានចចាមអារាម ម្តងជាម្តងពីរជាមួយនឹងពាក្យខ្សឹបខ្សៀវពីការមាន បានហួសប្រមាណ ដែលធ្វើឲ្យមជ្ឈដ្ឋានខាងក្រៅមានមន្ទិលសង្ស័យមិនចេះអស់មិនចេះហើយ នឹងភាពហ៊ឺហួសប្រមាណបែបនេះ។

ទាក់ទងជាមួយនឹងការមានបានរហូតលេចឮ ពាក្យចាមអារាមបែបនេះ បានធ្វើឲ្យ សុគន្ធ ថេរ៉ាយុ មិនមានការឆ្លើយតបនឹងដោយយកកំហឹងមកបញ្ចេញនោះទេ តារាចម្រៀងយេយេទាន់សម័យ ថេរ៉ាយុ បានបកស្រាយថា រាល់ការមានបានរបស់ខ្លួនបែបហ៊ឺហាររាល់ថ្ងៃនេះ ពិតជាមានការឧបត្ថម្ភមែន តែអ្នកឧបត្ថម្ភនេះ មិនមានអ្នកណាឆ្ងាយពីម្តាយឪពុករបស់ខ្លួនទេ។

សុគន្ធ ថេរ៉ាយុ បានលើកឡើងថា “ខ្ញុំមិនមានអ្នកជ្រោមជ្រែងអីណាទេបង ជាក់ស្តែងដូចជាផ្ទះវីឡា ឡាន អីនេះចឹងសុទ្ធតែរបស់ប៉ាម៉ាក់តាំងអស់ ចំណែកផ្ទះវីឡាថ្មីនេះ ក៏ជារបស់ម៉ាក់ដែរ តែគាត់គ្មានលុយឯណាទៅបង់ទាំងអស់ទេ គឺគាត់បង់ជាតំណាក់កាលៗ ប៉ុណ្ណោះ ” ។

សូមបញ្ជាក់ថា នៅថ្ងៃទី២០ ធ្នូ ខាងមុខនេះ តារាចម្រៀងរបស់ផលិតកម្មថោន នឹងប្រារព្ធធ្វើពិធីជួបជុំឡើងគេហដ្ឋានថ្មីមានទីតាំងចូលតាមក្លោងទ្វាវត្តសំរោងអណ្តែត មិនឆ្ងាយពីវីឡាទី១ នៅក្នុងម្តុំបូរីពិភពថ្មី វីឡាដែលគ្រោងនឹងឡើងនោះ មានតំលៃជិតកន្លះលានដុល្លា ចំណែកពិធីជប់លៀងឡើងគេហដ្ឋានថ្មី នឹងមានការអញ្ជើញចូលរួមពីបណ្តាភ្ញៀវភាគច្រើនដែលសុទ្ធសឹងតែជាអ្នកសិល្បៈ៕