SuperAngkor News | Cambodia News | Khmer News | World News | News | Health | Technoloy | Star | Travel

ភ្នំពេញ: ជារៀងរាល់ថ្ងៃ បើយើងធ្វើដំណើរកាត់តាមបណ្ដោយផ្លូវ៤៨៨ ( ផ្លូវពីមុខវិទ្យាល័យបឹងត្របែក ទៅរង្វង់មូល ផ្សារដើមថ្កូវ ) នៅជិតនឹងសាលាអន្ដរជាតិ ប៊ែលធី យើងនឹងឃើញមានកន្លែងលក់គ្រឿងសង្ហារឹម ដែលធ្វើពីផ្ដៅរបស់ពិធីការិនីម្នាក់។

កញ្ញាមានឈ្មោះ ដួង ម៉ាណា ជាពិធីការិនីប៉ុស្តិ៍លេខ១១ មួយរូប ហើយក៏ជាម្ចាស់អាជីវកម្មលក់គ្រឿងសង្ហារឹម ដែលធ្វើពីផ្ដៅ ស្ថិតនៅតាមបណ្ដោយផ្លូវ៤៨៨ ដែលចាប់បើកលក់ពីម៉ោង ៧ ព្រឹក រហូតដល់ម៉ោង ៥រសៀល។ ក្នុងការប្រកបរបរលក់គ្រឿងសង្ហារឹមនេះ វាមានការជំរុញយ៉ាងខ្លាំពីម្ដាយរបស់កញ្ញា ព្រោះជារបរ ដែលម្ដាយរបស់កញ្ញាស្រលាញ់ណាស់។

កញ្ញា ដួងម៉ាណា មានស្រុកកំណើត នៅខេត្តព្រះសីហនុ មានអាយុ ២៦ឆ្នាំ មានបងប្អូន ៦នាក់ ក្នុងនោះ ប្រុស ២នាក់ និងស្រី ៤នាក់ ដែលរូបកញ្ញា គឺជាកូនទី៤ ក្នុងគ្រួសារ។ កញ្ញាបានចាកចេញពីស្រុកកំណើត មកនៅភ្នំពេញ ប្រមាណជា ៥ឆ្នាំហើយ។ ក្នុងរយៈពេល ២ឆ្នាំដំបូង មុននឹងកញ្ញាប្រកបរបរលក់គ្រឿងសង្ហារឹម គឺកញ្ញាបានឈានជើងប្រឡូកក្នុងវិស័យសិល្បៈ។ កញ្ញាក៏បានដាក់ពាក្យប្រលងក្នុងកម្មវិធីមួយមានឈ្មោះថា "កម្មវិធីប្រុសឆ្លាត ស្រីឆ្លាត"។ ក្នុងការប្រលងនោះផងដែរ កញ្ញាបានឆ្លងរហូតដល់វគ្គ ១០ នាក់ចុងក្រោយ។

ប៉ុន្តែបន្ទាប់ពីនោះមក កញ្ញាក៏ទទួលបានការអញ្ជើញពីផលិតកម្មមួយចំនួន ដែលមានថតសំដែងជាបទចំរៀងខារ៉ា អូខេ ហើយក៏មានខ្សែភាគយន្តមួយរឿង "កំលោះលឺកឺ" ក្នុងនាមជាតួឯក ហើយក្នុងបទដែលកញ្ញាធ្លាប់បានថត គឺបទ "មិនចង់ធ្វើមនុស្សក្បត់"។

បន្ទាប់ពីឆ្លងកាត់ក្នុងវិស័យសិល្បៈអស់រយៈពេលប្រមាណជា ២ឆ្នាំ កញ្ញាក៏មកប្រកបរបរលក់គ្រឿងសង្ហារឹម ដែលធ្វើពីផ្ដៅ ជារបរដែលមានការជំរុញយ៉ាងខ្លាំងពីម្ដាយ ហើយក៏ជាមុនរបរ ដែលម្ដាយរបស់កញ្ញាប្រកបប្រមាណជា ១០ឆ្នាំហើយដែរ។

កញ្ញាបាននិយាយថា" ក្នុងការប្រកបរបរលក់គ្រឿងសង្ហារឹម ធ្វើពីផ្ដៅជារបរដែលម្ដាយរបស់ស្រលាញ់ខ្លាំងណាស់ ហើយគាត់ក៏បានជួយរាល់កិច្ចការទាំងអស់ ក្នុងការប្រកបរបរនេះ ឲ្យមានភាពល្អប្រសើរ ដូច្នេះហើយកញ្ញា ត្រូវផ្អាកពីវិស័យសិល្បៈមួយរយៈ ប៉ុន្តែប្រមាណជារយៈពេល ១ឆ្នាំកន្លងមកនេះ កញ្ញាបានបន្តការងារជាអ្នកសិល្បៈក្នុងនាមជាពិធីការិនី រហូតដល់សព្វថ្ងៃ"។

កញ្ញាជាពិធីការិនី ក្នុងកម្មវិធីប្រដាល់អន្តរជាតិ រៀងរាល់ចុងខែ និងកម្មវិធី "កំណប់អារម្មណ៍" ផ្សាយរៀងរាល់ថ្ងៃសុក្រ វេលាម៉ោង៦:៣០យប់ រហូតដល់ម៉ោង ៨:៣០នាទីយប់ នៅទូរទស្សន៍ប៉ុស្តិ៍អប្សារា ឬប៉ុស្តិ៍លេខ១១។ ទាក់ទងក្នុងការធ្វើផ្ដៅ ក្នុងរោងអាជីវកម្មរបស់កញ្ញា មានជាងប្រមាណជា ១០ នាក់ ហើយមានមេកាមួយរូប ក្នុងការកែច្នៃផ្ដៅ ឲ្យក្លាយទៅជាផលិតផលសំរេចដើម្បីលក់។ ការផលិតផ្ដៅឲ្យទៅជាគ្រឿងសង្ហារឹម រួមមាន សាឡុង កៅអី តុ ទូតាំង ជាដើម។

ក្នុងការប្រើពេលផលិតលក្ខណៈឈុតសាឡុងតូចធំមួយ ពី ៣ថ្ងៃ ទៅ ៥ថ្ងៃ។ កញ្ញាបានបន្តទៀតថា គ្រឿងសង្ហារឹមឈើមានអ្វី ផ្ដៅមានហ្នឹង។ កញ្ញាបានបង្ហាញតម្លៃមុខទំនិញមួយចំនួន ដូចជា សាឡុងមួយឈុតតូច មានតម្លៃ ១០០ ដុល្លារ ធំតម្លៃ ២០០ដុល្លារ កៅអីមួយតម្លៃ ១០ ទៅ ១៥ ដុល្លារ និងតុមួយ មានតម្លៃ ៣០ ទៅ ៥០ដុល្លារ។

ក្នុងលក្ខណៈពិសេស រឺល្អជាងនេះ សាឡុងមួយឈុតតូចតម្លៃ ១៥០ដុល្លារ ធំ ២៥០ដុល្លារ កៅអីមួយតម្លៃ ២០ ទៅ ៣០ដុល្លារ និងតុមួយតម្លៃ ៦០ទៅ ៧០ដុល្លារ។ នេះជាតម្លៃ សំរាប់បោះដុំ រីឯតម្លៃរាយមានលក្ខណៈខុសគ្នាបន្តិចបន្តួចប៉ុណ្ណោះ។

វាក៏លំបាកដែរ ដោយសារចំណាយក៏ច្រើនដែរ ចំណាយក្នុងការកម្មង់ផលិតផលសំរេចរបស់ផ្ដៅ ចំណាយការជួលផ្ទះ ដែលមានតម្លៃប្រមាណជាជិត ១០០០ ដុល្លារ ចំណាយទៅលើបុគ្គលិក ដែលក្នុងម្នាក់ទទួលបានប្រាក់ ១០០ដុល្លារ ក្នុងមួយខែ។

កញ្ញាបានបន្ថែមទៀតថា ដោយឡែករាល់ការចំណាយក្នុងមួយខែប្រមាណជា ៣០០០ ទៅ ៥០០០ ដុល្លារ ហើយកញ្ញាក៏ត្រូវចំណាយការផលិតផលសំរេចរបស់ផ្ដៅ ជួលផ្ទះទៅលើសំភារៈកែច្នៃ និងទៅលើបុគ្គលិក មធ្យោបាយដឹក ទំនិញ។ កញ្ញា អាចរកចំណូលមកវិញ ប្រមាណជា ៦០០០ ទៅ ៧០០០ ដុល្លារ ក្នុងមួយខែ៕