SuperAngkor News | Cambodia News | Khmer News | World News | News | Health | Technoloy | Star | Travel

រាជធានីភ្នំពេញ ៖ ទទួលបានការងារសម្តែងស្ទើរតែរើខ្លួនលែងរួច ខ្លាំងជាងកាលពីនៅវ័យក្រមុំទៀតនោះ អ្នកនាងសុខ សោម៉ាវត្តី រីករាយចំពោះរឿងនេះ ។ វត្តីចាត់ទុកផ្លែផ្កាក្នុងសួនសិល្បៈនេះផ្តើមចេញពីចំណុចសម្តែងបែបចរិតក្រមុំឡឺកឺ ធ្វើឱ្យមានការពេញនិយមពីទស្សនិកជន ។

អ្នកនាងសុខ សោម៉ាវត្តី បានទទួលស្គាល់ភាពក្រមិចក្រមើមធ្វើឱ្យមានការពេញនិយមនេះគ្រាដែលនាងចូលរួមសម្ពោធខ្សែភាពយន្តថ្មីរឿង «អ្នកនាងម្ចាស់ឡឺកឺ» របស់ផលិតកម្មមហាហង្ស កាលពីល្ងាចថ្ងៃទី១៧ ខែឧសភា ឆ្នាំ២០១៦ នៅរោងភាពយន្ត TK ទួលគោករាជធានីភ្នំពេញ ។ ពិធីនោះមានតារាសម្តែង និងទស្សនិកជនជាច្រើនចូលរួម ។

អ្នកនាងសុខ សោម៉ាវត្តី ពិធីការិនីល្បីឈ្មោះរបស់ទូរទស្សន៍បាយ័ននិយាយថា «នាងខ្ញុំបានចូលរួមសម្តែងភាពយន្តទាំងដុំ និងភាគជាច្រើនរឿងមកហើយមិនចាំប៉ុន្មានរឿងទេ ប៉ុន្តែអ្វីដែលនាងខ្ញុំមិនអាចបំភ្លេចបាន គឺដោយសារតែនាងខ្ញុំបានជោគជ័យក្នុងរឿង «ភូមិខ្ញុំស្រស់ឆើតឆាយ» បែបតួអង្គមានអត្តចរិតឡឺកឺ ឡប់ៗ កំប្លែងក្រមិចក្រមើម ទើបនាងខ្ញុំឆក់បានឱកាសសម្តែងបែបតួអង្គ សប្បាយៗ ចូលចិត្តធ្វើ ឡប់ៗ ឡឺកឺ ក្នុងភាពយន្តបន្តបន្ទាប់ ។ នេះប្រហែលជាអាចមកពីនាងខ្ញុំសម្តែងទៅគេចូលចិត្តដូច្នេះហើយបានជារឿង មួយៗនាងខ្ញុំមិនសូវជារៀបចំអត្តចរិតសុភាពប៉ុន្មានទេ » ។

តួអង្គសំខាន់ក្នុងរឿង «អ្នកនាងម្ចាស់ឡឺកឺ» សុខ សោម៉ាវត្តី បន្តទៀតថា ដោយឡែករឿងថ្មីរបស់ផលិតកម្មមហាហង្សដែលសម្ពោធដាក់បញ្ចាំងជាផ្លូវការនេះ គឺជាស្នាដៃទី២ហើយដែលនាងចាប់ដៃគូសម្តែងជាមួយលោកជា សុវណ្ណារិទ្ធិដែលជាដៃគូពិធីករនៅទូរទស្សន៍បាយ័នជាមួយគ្នា ។ រឿង «អ្នកនាងម្ចាស់ឡឺកឺ» មានឈុតឆាកបែបកំប្លែង សើចសប្បាយច្រើន ។ បណ្តាតួអង្គក្នុងរឿងសុទ្ធតែបញ្ចេញកាយវិការកំប្លែងធ្វើឲ្យទស្សនិកជនរីករាយ ។ នេះជាការខិតខំរបស់ក្រុមការងារផលិតកម្មមហាហង្ស ជាផលិតកម្មមួយខំលើកស្ទួយវិស័យកុនខ្មែរតាំងពីដើមមក ។

អ្នកនាងសុខ សោម៉ាវត្តី ឱ្យដឹងថា មួយរយៈនេះគេហៅនាងថតភាពយន្តច្រើន តែនាងចង់ផ្អាកសម្តែងខ្លះដែរ ព្រោះនាងសម្តែងច្រើនមកហើយ ។ មានទស្សនិកជនមួយចំនួនរិះគន់ថា ដាក់តួអង្គ ដដែលៗនាំឲ្យស៊ាំភ្នែក ។ ទោះជាយ៉ាងណាក្តីការរិះគន់នោះមានភាគរយតិច ហើយអ្នកចង់ឲ្យនាងសម្តែងមានច្រើន រាប់ទាំងម្ចាស់ផលិតកម្មនានាផង ។ ដូច្នេះហើយទើបនាងមិនចង់ចោលការងារដែលស្រឡាញ់បានហើយខិតខំបំពេញតាមការចង់បានរបស់ផលិតកម្ម ម្យ៉ាងចង់ទុកស្នាដៃឲ្យបានច្រើនពេលចាស់ទៅ ទាន់ខ្លួននៅក្មេង នៅមានសម្រស់ ។

ដោយឡែកតួអង្គប្រុសលោកជា សុវណ្ណរិទ្ធិ ដែលខកខានសម្តែងភាពយន្តមួយរយៈ និងបានវិលមកវិញតាមរយៈស្នាដៃថ្មីនៅផលិតកម្មមហាហង្សក្នុងរឿង«អ្នកនាងម្ចាស់ឡឺកឺ» មានក្តីរីករាយដែលបានចាប់ដៃគូសម្តែងជាមួយសុខ សោម៉ាវត្តី សាជាថ្មី ហើយនេះជាលើកទី២របស់ពួកគេ ។ រវាងលោកសុវណ្ណរិទ្ធ និងអ្នកនាងវតី្ត មានចរិតលេងសើចបែបកំប្លែងស្ទើរប្រហែលគ្នា ចូលចិត្តធ្វើឱ្យបរិយាកាសសប្បាយ ធ្វើមុខមាត់បែបកំប្លែង ។

លោកជា សុវណ្ណរិទ្ធ ស្នើទស្សនិកជនគាំទ្រភាពយន្តខ្មែរ ព្រោះវាចេះតែដើរទៅមុខជាបន្តបន្ទាប់ ។ អ្វីដែលពិសេសលោកជា សុវណ្ណរិទ្ធ ចង់ឲ្យមហាជនគាំទ្រផលិតកម្មមហាហង្សដែលខិតខំផលិតភាពយន្តខ្មែរជាច្រើនឆ្នាំមកហើយ ព្រមទាំងជួយតារាខ្មែរឲ្យមានការងារធ្វើមិនតិចនាក់ទេ ។

រឿង«ព្រះអង្គមាសឡឺកឺ» និទានពីនាងកាទី ជាសិស្សដែលទើបបញ្ចប់ថ្នាក់វិទ្យាល័យ និងបន្តចូលមហាវិទ្យាល័យផ្នែកស្ថាបត្យកម្មនៅភ្នំពេញ។ នាងជានារីស្រស់ស្អាត មានឧត្តមគតិខ្ពស់ តែជាមនុស្សរ៉ូមែនទិកជ្រុល ទើបធ្វើឲ្យកាទីគ្មានសង្សារទាល់តែសោះ ។ កាទីចូលចិត្តរឿងតុក្កតា ចង់បានជីវិតដូចព្រះនាងម្ចាស់ ជួបបុរសល្អដូចទេវបុត្រជិះសេះស ។ កាទីមានមិត្តភក្តិពីរនាក់ គឺសាន់នី និងម៉ានិច ។ ពួកគេទាំងបីស្នាក់នៅផ្ទះជួលជាមួយគ្នា ជាផ្ទះជួលដ៏តូចចង្អៀតសូម្បីតែបង្គន់ក៏រួមគ្នា ។ ថ្លៃមួយស្រាប់តែមានផ្ទះវីឡាដ៏ធំស្កឹមស្កៃបានដាក់ជួលឲ្យកាទីក្នុងតម្លៃថោកបំផុត ដោយនឹកស្មានមិនដល់ ។ ពួកនាងទាំងបីបានរើទៅនៅក្នុងវីឡានោះធ្វើឲ្យកាទីបានជួបនឹងវិបុត្រកំលោះសង្ហាអភិជន មានផ្ទះនៅជាប់វីឡាដែលនាងជួល ។ វិបុត្រជាបុរសដែលត្រូវតាមក្តីស្រមៃរបស់កាទីគ្រប់យ៉ាងធ្វើឲ្យកាទីចាប់ចិត្តតាំងពីថ្ងៃដំបូង ។
សាន់នី និងម៉ានិចបានរៀបចំគម្រោងការឲ្យកាទី និងវិបុត្របានជួបទាក់ទងគ្នា តែត្រូវបរាជ័យដោយសារតែភាពសស្លាក់សស្លើតរបស់កាទីបង្កើតជារឿងអស់សំណើច តែចុងក្រោយទើបដឹងថា វិបុត្រមិនមែនជាប្រុសពេញលក្ខណៈ តែជាខ្ទើយដែលស្រឡាញ់ភេទដូចគ្នាទៅវិញ ។

កាទីណាត់ជួបបុរសជាច្រើនដើម្បីស្វែងរកបុរសក្នុងក្តីស្រមៃ ប៉ុន្តែការណាត់ជួបក្លាយជារឿងអស់សំណើច ព្រោះតែបុរសទាំងនោះខ្លះជាមនុស្សសុភាព ឆ្លើយមួយម៉ាត់បាត់មួយម៉ោង ខ្លះជាបុរសនិយាយច្រើនហួស ហើយខ្លះទៀត បែរជាចរិតគគ្រេចស្មោកគ្រោក ។ ក្នុងថ្នាក់កាទីមានប្រុសថ្មីម្នាក់ឈ្មោះសមុទ្រ ។ សមុទ្រជាសិស្សដែលទើបតែផ្លាស់មកពីបរទេសចូលចិត្តធ្វើខ្លួនសាមញ្ញ ជាបុរសសង្ហា ឆ្លាត និងពូកែគ្រប់យ៉ាង ទាស់តែម្យ៉ាងគឺមាត់ដាច ។ សមុទ្រនិងកាទីឈ្លោះប្រកែកគ្នាតាំងពីថ្ងៃដំបូង បង្កើតជាភាពកាច់កុងគ្នាសើចសប្បាយរហូត ហើយបង្កប់នូវអនុស្សាវរីយ៍ជ្រាលជ្រៅ ។ ការណ៍ពិតសមុទ្រជាកូនអ្នកជំនួញដ៏ល្បី ហើយលួចស្រឡាញ់កាទីតាំងពីថ្ងៃដំបូង ។ គេតែងតែលួចជួយកាទី ដោយសម្ងាត់ សូម្បីតែការដាក់ជួលផ្ទះវីឡាឲ្យកាទីក្នុងតម្លៃថោកបំផុតក៏ជាគំនិតសមុទ្រ តែកាទីមិនបានដឹងរឿងនេះឡើយ ។ ទីបំផុតធ្វើឲ្យសមុទ្រដាច់ចិត្តបង្ហាញមនោសញ្ចេតនារបស់គេ ។ កាទីរំភើបចិត្តខ្លាំងណាស់នៅពេលដឹងថា សមុទ្រជាមនុស្សប្រុសមានគ្រប់ទាំងអស់ដូចក្តីស្រមៃចង់បានរបស់នាង ហើយហ៊ានសុំនាងរៀបការធ្វើឱ្យនាងស្រក់ទឹកភ្នែកនិងឆ្លើយថាយល់ព្រម ។

រឿង «អ្នកនាងម្ចាស់ឡឺកឺ» និពន្ធដោយកញ្ញាម៉ៅ ចាន់រស្មី និងដឹកនាំរឿងដោយលោកទិត ធារិទ្ធិ ។ ចូលរួមសម្តែងដោយលោកជា សុវណ្ណារិទិ្ធ, សុខ សោម៉ាវត្តី លោកលឹម រដ្ឋា អ្នកនាងស៊ុំ សុម៉ាលី លោកអូន ឧស្សាហ៍ និងកញ្ញាពេជ្រ ចិន្តា ជាដើម ៕