SuperAngkor News | Cambodia News | Khmer News | World News | News | Health | Technoloy | Star | Travel

តារាចម្រៀងថោន សុគន្ធ និសា ហាក់ស្ងប់ស្ងាត់ ក្រោយវិលមកពីប្រទេសបារាំង ហើយក៏ប្រញាប់រៀបយុទ្ធសាស្ត្រថ្មី ដើម្បីបង្កើនប្រជាប្រិយភាពឡើងវិញ។ នាងអះអាងថា នឹងធ្វើឱ្យទស្សនិកជន ភ្ញាក់ផ្អើល នាពេលឆាប់ៗនេះ ជាមួយនឹងការបង្កើត ក្រុមរាំផ្ទាល់ខ្លួន។ យុទ្ធសាស្ត្រដូច្នេះ គឺស្របពេលមានដំណឹងថា មានបុរសនៅបារាំង សុំស្នេហ៍ តែនាងមិនអើពើនោះទេ។

ស្ថិតក្នុងសភាពបាត់បង់ប្រជាប្រិយភាពខ្លះ កញ្ញា សុគន្ធ និសា បានឲ្យដឹងថា ការចាកឆ្ងាយស្រុកផ្ញើខ្លួនប្រាណ នៅស្រុកគេមួយរយៈកន្លងទៅនេះ ពិតជាទទួលបានជោគជ័យ លើសពីការរំពឹងទុក។ ប៉ុន្តែនាងទទួលស្គាល់ថា ការអវត្តមានពីស្រុកខ្មែរពិតជាធ្វើឱ្យ កេរ្តិ៍ឈ្មោះរបស់នាងចុះខ្សោយប្រាកដមែន។

តារាលំដាប់ជួរមុខរូបនេះ បញ្ជាក់ថា នាងនឹងរៀបយុទ្ធសាស្ត្រថ្មី ដើម្បីពង្រឹងសំឡេង គាំទ្រឡើងវិញ។ ក្នុងនោះ នាងនឹងសម្រិតសម្រាំងផលិតនូវបទថ្មីៗ ឱ្យមានគ្រប់រសជាតិ ដើម្បីបម្រើអារម្មណ៍ទស្សនិកជន។ ទន្ទឹមនឹងនោះ នាងក៏ត្រៀមបង្កើតក្រុមរាំផងដែរ ព្រោះ យល់ថា វាជាចំណុចដ៏ទាក់ទាញមួយ នាសម័យកាលនេះ។

កញ្ញា សុគន្ធ និសា បន្តថា “តាមពិត ខ្ញុំអត់មានទេពកោសល្យខាងរាំហ្នឹងទេ ប៉ុន្តែខ្ញុំនឹងព្យាយាម ធ្វើឱ្យអស់ពីលទ្ធភាព ដើម្បីបុកឱ្យចំតម្រូវការទីផ្សារ។ ម្យ៉ាងក៏ចង់ដឹងពីសមត្ថភាពរបស់ខ្លួនផងដែរថា តើអាចធ្វើបានប៉ុនណា? តែអ្វី ដែលខ្ញុំរំពឹងខ្ពស់ជាងនេះនោះ គឺវ៉ុលចម្រៀងថ្មី ដែលត្រៀមនឹងផលិតនាពេលឆាប់ៗនេះ ហើយខ្ញុំជឿថា នឹងមានភាពទាក់ទាញជាងវ៉ុលមុនៗ”។

ទោះយ៉ាងណា និសា ប្រាប់ពីជំហរបស់ខ្លួនថា “នៅកន្លែងចាស់ (ហង្សមាស) ពិតជា មានទីផ្សារទូលាយមែន ព្រោះជាផលិតកម្ម ដែលធំ បានចាក់គ្រឹះរឹងមាំជាច្រើនឆ្នាំមកហើយ។ ប៉ុន្តែខ្ញុំនៅតែមានសង្ឃឹមជាមួយថោន ហើយខ្ញុំនឹងព្យាយាមប្រឹងប្រែងបន្ថែមទៀត ដើម្បីបម្រើអារម្មណ៍ទស្សនិកជន”។

ក្រោយពីប្រេះឆាស្នេហ៍កណ្តាលទីជាមួយកវី សុខ ជំនោរ តារារូបនេះ បានបន្ថែមថា ក្រោយពេលវិលត្រឡប់មកពីបារាំងវិញ នាងនៅតែឆក់បានទីផ្សារចម្រៀង តាមកម្មវិធី នៃការប្រគំតន្ត្រីធំៗ នៅតាមបណ្តាខេត្តមួយចំនួន។ ក្រៅពី នោះ មានស្ប៉តពាណិជ្ជកម្មមួយចំនួន បានទាក់ទងនាង តែមិនទាន់ចរចាត្រូវរ៉ូវតម្លៃគ្នា។

បន្ទាប់ពីចេញទៅសម្តែងនៅបារាំងមួយរយៈ កញ្ញាមានចរិកសុភាពរាបសារម្នាក់នេះ បានទទួលស្គាល់ថា ពិតជាមានប្រុសស្រុកបារាំង សុំស្នេហ៍ ដូចជាពាក្យលេចឮមែន ប៉ុន្តែនាងមិនអើពើសោះឡើយ។ តារាស្រគត់ស្រគំមានមន្តស្នេហ៍ សុគន្ធ និសា បន្តថា “មិនអត់ទេ! អ្នកដែលសុំស្រលាញ់ ហើយតារាខ្មែរមួយចំនួនទៀត ដែលទៅទីនោះក៏អីចឹងដែរ។ ប៉ុន្តែ សម្រាប់ខ្ញុំមិនទាន់ចង់គិតពីរឿងនេះទេ ហើយខ្ញុំចង់និយាយពីការងារច្រើនជាងរឿងនេះ”៕