SuperAngkor News | Cambodia News | Khmer News | World News | News | Health | Technoloy | Star | Travel

តារាសម្តែង និងជាពិធីករដ៏ស្រស់សង្ហា ចង្កាព្រែក លោក ញ៉ែម សុគន្ធ មួយរយៈមកនេះ ទាំងប្រជាប្រិយ ភាព និងការគាំទ្រ ហាក់ឈានឡើងទៅមុខជាលំដាប់ ហើយថែមទាំងលេចមុខ ស្ទើរតែគ្រប់សាច់រឿង ក្នុងកម្មវិធីតាមទូរទស្សន៍ផ្សេងៗ។ ចំណែករឿងស្នេហ៍សុំលាក់សិន ចាំដល់ថ្ងៃចូលរោងការ តែលោកប្រាប់ថា មានស្នេហាហើយ ។

តារាសម្តែង លោក ញ៉ែម សុគន្ធ បានឲ្យដឹងថា សម្រាប់ការងារសិល្បៈ សព្វថ្ងៃ គឺចាប់ពីដើមឆ្នាំ២០១៣ មានភាពរវល់ច្រើន ព្រោះមានការងារជាបន្តបន្ទាប់គ្នាមករហូត ។ លោកទើបតែថតបញ្ចប់ពីររឿង គឺ រឿង “Road to freedom” និងរឿង “កុមារី២៥ឆ្នាំវគ្គ២” ក៏ចាប់ផ្តើមបញ្ចាំងតាមរោងភាពយន្តនានានិងស្ប៉តពាណិជ្ជកម្មមួយចំនួន ទៀត ។

តារាសម្តែងប្រុសរូបនេះ បានបន្តថា ទាំងការសម្តែងខ្សែរឿង ការថតស្ប៉តពាណិជ្ជកម្ម និងតំណែងជាពិធីករនៅស្ថានីយទូរស្សន៍ប៉ុស្តិ៍ហង្សមាស គឺមានភាពមមាញឹកខ្លាំង។ ព្រមជាមួយគ្នានេះ លោកក៏មានឱកាសច្រើនក្នុងការបង្ហាញមុខនៅទូរស្សន៍ប៉ុស្តិ៍ហង្សមាស តាមរយៈការធ្វើជាពិធីករនៅតាមកម្មវិធីមួយចំនួននៅទីនោះ ។

ទាក់ទិននឹងរឿងជីវិតស្នេហាផ្ទាល់ខ្លួនក្រៅឆាកវិញ ត្រូវបានបុរសសង្ហា ញ៉ែម សុគន្ធ និយាយប្រាប់ថា “ទាក់ទិននឹងរឿងជីវិតស្នេហា គឺខ្ញុំគិតយូរមកហើយ តែគ្រាន់ថា ថ្ងៃរៀបការមិនទាន់ហ៊ានសម្រេច ស្នេហាវាមានយូរមកហើយ អាយុប៉ុណ្ណឹងហើយមិនដែលអត់ទេ” ។

ទោះបីជាលោក ញ៉ែម សុគន្ធ បានបង្ហើបប្រាប់ថា មានស្នេហ៍រួចមកហើយយ៉ាងណាក្តី ប៉ុន្តែលោកមិនឱ្យដឹងពីនារីម្នាក់នោះជានរណា មានការងារអ្វី ហើយនៅទីណាទេ ។ គ្រាន់តែលោកបញ្ជាក់ថា “ខ្ញុំមិនទាន់ហ៊ាននិយាយអីឱ្យច្រើនជាងនេះទៀតនោះទេ ចាំដល់ថ្ងៃចូលរោងការទើបដឹងថាជាមនុស្សបែបណាពេលដែលឃើញគឺពេលហ្នឹងតែម្តង” ។

គួររំលឹកថា តារាសម្តែងសម្បូរស្នេហ៍ចង្កាព្រែក លោក ញ៉ែម សុគន្ធ ជាអតីតហ្រេ្វសស៊ីប៊យ កាលពីអំឡុងឆ្នាំ២០០២។ ចាប់ពីពេលនោះមក លោកបានក្លាយខ្លួនជាតារាសម្តែងតែម្តង។ ផ្លែផ្កាពីសិល្បៈប៉ុន្មានឆ្នាំមកនេះ បានប្រែក្លាយឱ្យលោកទៅជាតារាប្រុសមួយដួងដែលទទួលបានជោគជ័យ ថែមទាំងមានប្រជាប្រិយភាព និងការគាំទ្រខ្លាំងពីសំណាក់ទស្សនិជនគ្រប់ស្រទាប់វណ្ណៈ រហូតដល់បច្ចុប្បន្ននេះ ៕