SuperAngkor News | Cambodia News | Khmer News | World News | News | Health | Technoloy | Star | Travel

លោក កុយ ស៊ីឌឿន អតីតសិស្សសាលាវិចិត្រសិល្បៈ នៅអំឡុងទសវត្សរ៍ទី៨០ បានបង្កើតក្លឹបសិល្បៈ DP មានទីតាំងនៅខាងត្បូង សារមន្ទីរឧក្រិដ្ឋកម្មប្រល័យពូជសាសន៍ ទួលស្លែង ដើម្បីបណ្តុះបណ្តាល សិល្បៈបុរាណ ជាច្រើនទម្រង់ ។ លោកកុយ ស៊ីឌឿន មានប្រសាសន៍ក្នុងជំនួបជាមួយ កោះសន្តិភាពកាលពីពេលថ្មីៗនេះថា គោលបំណងដែលលោកបង្កើតក្លឹបសិល្បៈនេះឡើង គឺដើម្បីតម្រែតម្រង់ក្មេងៗ ជំនាន់ជឿនលឿននេះ ឱ្យយល់ដឹងពីបុណ្យបាប ស្គាល់ល្អអាក្រក់ ដឹងគុណឪពុកម្តាយ គ្រូអាចារ្យ និងចៀសផុតពីអំពើអបាយមុខ ដូចជាគ្រឿងញៀនដែលសង្គមស្អប់ខ្ពើម ។

លោកមានគំនិតចង់ឱ្យគេយល់ពីអ្វីដែលជាអំពើល្អ និងយកពេលទំនេរពីការរៀនសូត្រមករៀនសិល្បៈ លេងកីឡា និងធ្វើអ្វីដែលមានប្រយោជន៍ មិនគួរយកពេលចូលក្លឹបរាំរែកអស់លុយកាក់ឥតប្រយោជន៍ឡើយ ។លោក ស៊ី ឌឿន បើកក្លឹបបង្រៀនសិល្បៈ
នេះជិត១ឆ្នាំហើយ ដោយមានសិស្សជិត១០០នាក់ ទាំងតូចទាំងជំទង់ ។ អ្នកខ្លះរៀនរបាំ រៀនច្រៀង រៀនសម្តែង និងធ្វើជាពិធីករ ។ ក្លឹបរបស់លោកបង្រៀនរបាំជូនពរ របាំគោះត្រឡោក របាំគែន របាំអប្សរា ល្ខោនបាសាក់ យីកេ និងល្ខោននិយាយជាដើម ។
លោកប្រធាន ក្លឹបបន្តថា លោកបានយកគ្រូពីសាលាវិចិត្រសិល្បៈមកបង្រៀនដើម្បីឱ្យសិស្សមាន ជំនាញច្បាស់លាស់ ស្រួលរកការងារធ្វី និងជួយដល់លោកគ្រូ អ្នកគ្រូបានការងារក្រៅម៉ោងបន្ថែមទៀត ។

ចំពោះសិស្សណាមិនយកចិត្តទុកដាក់ ឬមិនស្តាប់ការណែនាំនឹងបញ្ឈប់មិនឱ្យចូលហាត់ទេ ព្រោះគោរពតាមគោលការមារយាទល្អ ស្តាប់គ្រូ គោរពវិន័យ និងព្យាយាម ។ ធ្វើបែបនេះបានសិស្សទាំងនោះពិតជាអាចគ្រប់គ្រងខ្លួនគេបាន ហើយទៅធ្វើការទីណាក៏ចុះសម្រុងនឹងគេដែរ ។ លោកប្រធានក្លឹបនិយាយថា «គោលបំណងរបស់ខ្ញុំមិនសំដៅលើលុយកាក់ទេ គឺចង់លើកស្ទួយសិល្បៈបុរាណ និងចង់ឱ្យអ្នកជំនាន់ក្រោយចាប់យកជំនាញសិល្បៈបុរាណបន្តវេន និងជួយថែរក្សាឱ្យបានគង់វង្ស ។ លើសពីនេះ ខ្ញុំបានជួយរកការងារឱ្យសិស្សនៅទីនេះបានធ្វើការតាមជំនាញ សិល្បៈរបស់គេបានជាច្រើននាក់ ធ្វើឱ្យជីវភាពគេប្រែប្រួល» ។

ទៅថ្ងៃមុខ លោក កុយ ស៊ីឌឿន មានបំណងរៀបចំការសម្តែងជាប្រចាំក្នុង១អាទិត្យ២ដងលក់សំបុត្រដោយ ឱ្យសិស្សសម្តែងផ្ទាល់ជូនភ្ញៀវបរទេសទស្សនា ព្រោះក្លឹបនៅជិតកន្លែងជនបរទេសទៅទស្សនាគុកទួលស្លែង ។ ការរៀបចំការសម្តែងដើម្បីឱ្យក្មេងៗបានកម្រៃ និងមួយផ្នែកទៀតលោកយកទៅជួយក្មេងកំព្រាខ្វះខាត ដែលលោកអាចធ្វើបានដើម្បីជួយការងារខ្លះក្នុងសង្គម។ កុមារី ឆាយ សំណាង រៀនថ្នាក់ទី៦ នៅសាលាបឋមសិក្សាកៀនឃ្លាំងឱ្យដឹងថា នាងបានចូលហាត់រៀនសិល្បៈនៅក្លឹប DP ពេលទំនេរពីរៀននៅសាលារដ្ឋ ព្រោះនាងស្រឡាញ់សិល្បៈបុរាណខ្មែរ។ ទាន់ខ្លួននៅក្មេង នាងខិតខំហាត់រៀនរបាំខ្មែរដើម្បីពេលធំដឹងក្តីអាចចាប់យកជា អាជីព ៕