រយៈពេល៣ថ្ងៃ នៃថ្ងៃចូលឆ្នាំចិន វៀតណាម កន្លងទៅថ្មីៗនេះ គេសង្កេត ឃើញថា មានប្រជាពលរដ្ឋជា ច្រើនបាននាំគ្នាទៅ កម្សាន្តនៅតំបន់ រមណីយដ្ឋានធម្មជាតិវត្ត កៀនស្វាយក្រៅដែលមានទីតាំងស្ថិតនៅភូមិធំ ឃុំ ភូមិធំ ស្រុកកៀនស្វាយ ខេត្តកណ្តាល ដើម្បីស្រូបយកខ្យល់ធម្មជាតិ និងពិសាអាហារដ៏មានឱជារសបែបធម្មជាតិ ។

ចំពោះមូលហេតុនោះ គឺដោយសារតំបន់នេះ បានអភិវឌ្ឍន៍ ស្រស់ស្អាតមានទីធ្លាធំទូលាយ ហើយមានរោងមានខ្ចូស សម្រាប់នាំក្រុមគ្រួសារអង្គុយលេងបានល្អ ថែមទាំងមានសន្តិសុខសុវត្ថិភាពល្អ ដោយមានសមត្ថកិច្ចនគរបាល និង កម្លាំងប្រជាការពាររក្សាសន្តិសុខជូនថែមទៀតផង ។

សូមបញ្ជាក់ថា មរណីយដ្ឋានធម្មជាតិវត្តកៀនស្វាយ ក្រៅ នៅជាប់ផ្លូវជាតិលេខ១បើធ្វើដំណើរពីលិច ទៅកើត ទិសដៅឆ្ពោះទៅអ្នកលឿងនៅខាងឆ្វេងដៃ ក្រោមការអភិវឌ្ឍន៍ផ្ទាល់ពីលោក ម៉ក់ ពេជ្ជរិទ្ធ អគ្គនាយកដ្ឋានកាំកុង ត្រូលនៃក្រសួងពាណិជ្ជកម្ម បានកំពុងទាក់ទាញភ្ញៀវទេសចរ មកលេងកាន់តែច្រើនឡើងៗ។

ក្នុងឱកាសចូលឆ្នាំចិន វៀតណាម រយៈពេល៣ថ្ងៃនេះ លោក ហេង ធៀម អភិបាលស្រុកកៀនស្វាយបានឲ្យដឹងថា នៅរមណីយដ្ឋានធម្មជាតិវត្តកៀនស្វាយ ក្រៅមានភ្ញៀវទេសចរខ្មែរ មកលេងចំនួន១២០០០នាក់ និង ភ្ញៀវអន្តរជាតិ ចំនួន២៤០០នាក់ ។ លោក ហេង ធៀម សូមអំពាវនាវដល់បងប្អូនប្រជាពលរដ្ឋ ដែលមកកម្សាន្តសូមបន្តមកកម្សាន្ត ឲ្យបានច្រើន ដើម្បីលើកស្ទួយជីវភាព ប្រជាពលរដ្ឋ នៅស្រុក កៀនស្វាយ ៕

(ប្រភព: ដើមអម្ពិល)