ដើមអម្ពិល, ញ៉ូវដែលី៖ សារព័ត៌មាន ចិនស៊ិនហួ ចេញផ្សាយ​​ថ្ងៃទី១១ ខែកក្កដា ឆ្នាំ២០១៤​ នេះបានឲ្យដឹងថា រដ្ឋ​ធានីប្រទេស ឥណ្ឌា ជាប់ចំណាត់​ថ្នាក់ជាទីក្រុង ដែលមានមនុស្ស រស់នៅច្រើន​ជាងគេទីពីរ លើពិភពលោក។ នេះបើ​យោងតាម របាយការណ៍ របស់អង្គការ​សហប្រជាជាតិ។

យោងតាមរបាយការណ៍ ដែលចេញផ្សាយ​ដោយអង្គការសហ​ប្រជាជាតិ ដែលហៅ​ កាត់ថា UN បានបង្ហាញថា បច្ចុ​ប្បន្ន​ទីក្រុង ញ៉ូវដែលី មានកំណើន ប្រជាជនរហូត​ដល់២៥លាននាក់ ដែលចំនួននេះ​បានកើនឡើងទ្វេដង បើ​ប្រៀប​ធៀបទៅនឹង តួលេខកាលពី​ឆ្នាំ១៩៩០ វាជាកត្តា នាំឲ្យទីក្រុងនេះក្លាយជាទីក្រុង ដែលមាន​មនុស្សរស់នៅ ច្រើន​ជាង​គេទីពីរ បន្ទាប់ពីទីក្រុង តូក្យូ។

ជាមួយគ្នានេះដែរ ទីក្រុង ម៉ុមបៃ ស្ថិតនៅក្នុងចំណាត់​ថ្នាក់ទីបួន ក្នុងចំណោមទីក្រុង​ដែលមាន មនុស្សរស់នៅ​ច្រើន​ជាងគេ លើពិភពលោក ដោយមាន​មនុស្ស ចំនួន២១លាននាក់។ ដោយឡែក​ទីក្រុង សៀងហៃស្ថិតនៅ​ក្នុងចំណាត់​ថ្នាក់​ទីបី ដោយមានប្រជា​ជន​រស់នៅ ចំនួន២៣​​លាននាក់៕