SuperAngkor News | Cambodia News | Khmer News | World News | News | Health | Technoloy | Star | Travel

កំពត: បន្ទាប់ពីបានបង្កើតឡើង ក្រោមការជ្រោមជ្រែង ឧបត្ថម្ភគាំទ្រ ដោយអង្គការអភិវឌ្ឍស្ត្រី និងកុមារ ប្រចាំកម្ពុជា (CWDCC) រួមសហការជាមួយ អាជ្ញាធរមូលដ្ឋាន និងការជួយ ជ្រោមជ្រែង ពីសំណាក់ ស្ថាប័នជំនាញនានា អំឡុងរយៈពេលជាងប្រាំឆ្នាំ កន្លងមកនេះ សហគមន៍នេសាទ ត្រពាំងសង្កែ ដែលមានមូលដ្ឋាន ក្នុងភូមិត្រពាំងសង្កែ ឃុំត្រពាំងសង្កែ ស្រុកទឹកឈូ ខេត្តកំពត បានដំណើរកិច្ចការងារ របស់ខ្លួនយ៉ាងរស់រវើក ព្រមទាំងបានផ្តល់ប្រយោជន៍ ចំពោះប្រជាពលរដ្ឋសហគមន៏ និងអ្នករស់នៅតំបន់ជុំវិញ តាម រយៈការរកចំណូលបន្ថែម ពាក់ព័ន្ធវិស័យទេសចរណ៍ បែបធម្មជាតិ។

ដើម្បីបានដល់ទីតាំង នៃរមណីយដ្ឋាន ដ៏សែនមនោរម្យនេះ ភ្ញៀវទាំងឡាយ អាចធ្វើដំណើរចេញ ពីទីរួមខេត្តកំពត តាមបណ្តោយ ផ្លូវជាតិលេខ៣៣ តម្រង់ឆ្ពោះទៅខេត្តកែប ចម្ងាយប្រហែល ប្រាំពីរគីឡូម៉ែត្រ។ ហួសសាលាឃុំត្រពាំងសង្កែ ប្រមាណប្រហែល ពីររយម៉ែត្រ អ្នកទេសចរទាំងឡាយ នឹងពើបប្រទះ ឃើញផ្ទាំងប៉ាណូស្វាគមន៍ របស់សហគមន៍នេសាទ ត្រពាំងសង្កែ ស្ថិតនៅផ្នែកខាងស្តាំ។

ចុះពីផ្លូវជាតិប្រមាណ ត្រឹមបីរយម៉ែត្រ ដែលអាចធ្វើដំណើរបាន ទាំងរថយន្ត ម៉ូតូ កង់ ដោយឆ្លងកាត់ភូមិឋាន ប្រជា ពលរដ្ឋ ជនានុជនទាំងឡាយ នឹងចូលដល់ទីតាំងផ្ទាល់ នៅក្បែរនឹងដៃសមុទ្រមួយ មានឈ្មោះថា ព្រែកក្បាលរមាស បន្ទាប់ពីគយគន់ស្រែស្រូវ ច្បារដំណាំ ពិសេសស្រែអំបិល ដែលជាផលិតផល មិនអាចខ្វះបាន សម្រាប់ជីវភាពប្រចាំថ្ងៃ របស់ប្រជាជន ទូទាំងក្នុង និងក្រៅប្រទេស។

ទីនេះសហគមន៍ មានកន្លែងសម្រាក ដើម្បីបន្ធូរអារម្មណ៍ មានកន្លែងប្រជុំ មានសេវាកម្ម ម្ហូបអាហារចម្អិន នៅនឹង កន្លែង សម្រាប់ជូនភ្ញៀវពិសា និងមាន ថ្នាលបណ្តុះកូនកោងកាង ប្រកបដោយពណ៌បៃតង ស្រស់បំព្រង។ គោលដៅចុងក្រោយ និងសំខាន់ មិនអាចខកខានបាន ចំពោះការមកកាន់ សហគមន៍នេសាទមួយនេះ គឺដំណើរទេសចរណ៍ ក្នុងដែនធម្មជាតិ ដែលចាំបាច់ ត្រូវបន្តដំណើរតាមទូក ក្នុងព្រែកក្បាលរមាស ជាមួយទេសភាព ដ៏ល្អត្រកាល នៃព្រៃលិចទឹក នៅអមសងខាង ដើម្បីបានដល់តំបន់អេកូ ទេសចរណ៍ ព្រៃកោងកាង នាឆ្នេរសមុទ្រ ក្រោមការគ្រប់គ្រង ពីសំណាក់សហគមន៍ នេសាទត្រពាំងសង្កែ។

អារម្មណ៍ប្លែក នឹងចាប់ផ្តើម នៅពេលខ្លួនប្រាណប៉ះផ្ទាល់ ជាមួយខ្យល់សមុទ្រ ដ៏ល្អបរិសុទ្ធ ខណៈចូលដល់ជំរុំ នៃម្លប់កោងកាង យ៉ាងត្រឈឹងត្រឈៃ រួមទាំងស្ពានដើរកម្សាន្ត ក្នុងព្រៃកោងកាង រាប់រយម៉ែត្រនោះ។ ទីនេះ ក្រៅពីការផ្តិតយក ទេសភាពដ៏ខៀវស្រងាត់ ការដើរកម្សាន្តពេលថ្ងៃ ភ្ញៀវអាចសម្រាក (ទោះបីលក្ខណៈគ្រួសារ) ក្នុងពេលរាត្រី ដោយសហគមន៍ បានបង្កើតជា បឹងហ្គាឡូ ដើម្បីគយគន់ទូកអ្នក នេសាទ ស្តាប់សំឡេងសត្វ ពិសេសមើលពន្លឺភ្លើង នៃហ្វូងអំពិលអំពែក។

លោក សឹម ហ៊ីម ប្រធានសហគមន៍ នេសាទត្រពាំងសង្កែ បានរៀបរាប់ថា ក្រោមការគាំទ្ររបស់ អង្គការអភិវឌ្ឍស្ត្រី និងកុមារនៅកម្ពុជា ព្រមទាំងកិច្ចសហការ រវាងអាជ្ញាធរមូលដ្ឋាន ការជួយជ្រោមជ្រែង ពីខណ្ឌរដ្ឋបាលជលផល មន្ទីរបរិស្ថានខេត្ត និងផ្នែកពាក់ព័ន្ធដទៃទៀត សហគមន៍នេសាទត្រពាំងសង្កែ ត្រូវបានបង្កើតឡើង កាលពីថ្ងៃទី១០ ខែកក្កដា ឆ្នាំ២០០៩ គ្រប់គ្រងលើដែននេសាទ ទំហំ ៣៣៧ ហិកតា ក្នុងនោះព្រៃកោងកាង មានចំនួន ៣១ ហិកតា។

បំណងនៃការបង្កើត សហគមន៍នេះឡើង ដើម្បីការពារតំបន់នេសាទ ថែរក្សាព្រៃលិចទឹក បញ្ចៀសពីបទល្មើសផ្សេងៗ។ តាមការសង្កេតឃើញជាក់ស្តែង បន្ទាប់ពីបានបង្កើតឡើង នៅតំបន់នេះ ផលនេសាទ មានការកើនប្រមាណ ៦០ ភាគរយ ដោយសម្បូរត្រី ក្តាម ខ្យង បង្គា.. ក្នុងដែនដែលសហគមន៍ គ្រប់គ្រងផ្ទាល់។

ដោយឡែក សម្រាប់ព្រៃលិចទឹកវិញ សហគមន៍ បានដាំបន្ថែមនូវ កោងកាងថ្មី ២៥ ហិកតា ធ្វើឱ្យទំហំ កើនដល់ ៥៦ ហិកតា។ កាលពីមិនទាន់ មាន ការការពារ ថែរក្សាព្រៃលិចទឹកទាំងនេះ ត្រូវប្រជាពលរដ្ឋ កាប់យកឈើដុត ធ្វើឱ្យដើមកោងកាង ស្ទើរតែវិនាសហិនហោច ដែលតម្រូវឱ្យជួសជុល ឡើងវិញ។ ម្ល៉ោះ ហើយ សម្រាប់ផ្ទៃដីដាំដុះថ្មី មិនជាបញ្ហាទេ ដែលមកដល់ពេលនេះ បានលូតលាស់ល្អជាងមុន ប្រហែល ៨០ ភាគរយ។

លោកប្រធានសហគមន៍ បានបន្តទៀតថា ជាមួយនឹងការរីក ដុះដាលព្រៃកោងកាង សហគមន៍បង្កើតបាន នូវតំបន់អេកូទេសចរណ៍ ដែលធ្វើឱ្យសមាជិកសហគមន៍ និងអ្នករស់នៅតំបន់ជុំវិញ អាចរកចំណូលបាន តាមរយៈការបើកទូក ដឹកភ្ញៀវដើរកម្សាន្ត ការលក់ម្ហូបអាហារ សេវាបកប្រែផ្សេងៗ ហើយចំណូលទាំងនោះ ត្រូវបង់ចំនួន ២០ ភាគរយ សម្រាប់អភិវឌ្ឍសហគមន៍បន្ត ខណៈដែលមកដល់ពេលនេះ មិនមានផ្នែកខាងណា ជួយឧបត្ថម្ភទៀតទេ។

ដោយឡែក សហគមន៍មានទូកម៉ាស៊ីន មានខ្ចូស នៅដែនព្រៃកោងកាង និងកន្លែងសម្រាប់ជួលប្រជុំ ដោយកន្លងមក ខាងអង្គការ ក្រៅរដ្ឋាភិបាល បានធ្វើជាញឹកញាប់ នៅទីតាំងនេះផ្ទាល់។ ដូច្នេះសហគមន៍ ពឹងផ្អែកលើសប្បុរសជន ក្នុងការគាំទ្រ ដើម្បីដំណើរការអភិវឌ្ឍន៍បន្ត ដោយមិនមែនតម្រូវ ជាការបរិច្ចាគអ្វីមួយទេ តែតាមរយៈការមកកម្សាន្ត ឬក៏ចូលរួមក្នុងការដាំដុះ ជួសជុល ថែរក្សាព្រៃលិចទឹក ក៏ដូចជា បញ្ចៀសនូវបទល្មើស នេសាទផ្សេងៗ នៅសហគមន៍របស់លោក។

ពាក់ព័ន្ធនឹងសហគមន៍ ខាងលើ លោក ណុះ សើ មេឃុំត្រពាំងសង្កែ បានរៀបរាប់ថា បន្ទាប់ពីការបង្កើតឡើង ដែលធ្វើឱ្យប្រជាពលរដ្ឋ អាចរកផលសមុទ្រ បានច្រើនជាងមុន ប្រជាពលរដ្ឋ ក្នុងឃុំត្រពាំងសង្កែ និងបណ្តាឃុំមួយចំនួន ទៀត នៅតំបន់ជុំវិញ បានទទួលផលចំណេញ ដោយសារការបង្កើត សហគមន៍នេសាទ តាមរយៈចំណូលបន្ថែម ពីអេកូទេសចរណ៍ ដូចជាសេវាដឹកភ្ញៀវកម្សាន្ត ការលក់ដូររបស់របរ រកបានពីសមុទ្រជាដើម។

ក្នុងនាមអាជ្ញាធរ លោកសង្ឃឹមថា បណ្តាសប្បុរសជនទាំងឡាយ នឹងបន្តគាំទ្រសកម្មភាព របស់សហគមន៍ នេសាទត្រពាំងសង្កែ ឱ្យមានដំណើរទៅមុខ ដែលជាផ្នែកមួយ ចូលរួមថែរក្សាការពារ ធនធានសមុទ្រ និងជាគ្រឹះ ក្នុងការទប់ស្កាត់បទល្មើស ដើម្បីអនាគតអ្នកជំនាន់ក្រោយ៕