SuperAngkor News | Cambodia News | Khmer News | World News | News | Health | Technoloy | Star | Travel

រាជធានីភ្នំពេញ ៖ «កម្ពុជាទទួលបានក្រុមហ៊ុនទេសចរណ៍ ដែលមានសក្តានុពលក្នុងការទាក់ទាញទេសចរជប៉ុន» លោក ថោង ខុន រដ្ឋមន្ត្រីក្រសួងទេសចរណ៍ បានថ្លែងបែបនេះនៅក្នុងពិធីសម្ពោធក្រុមហ៊ុនទេសចរណ៍ JTB Cambodia កាលពីល្ងាចថ្ងៃទី១៧ ខែកុម្ភៈ នៅសណ្ឋាគាសូហ្វីតែលភូគីត្រាភ្នំពេញ ។

លោករដ្ឋមន្ត្រី មានប្រសាសន៍ថា ទីផ្សារជប៉ុនគឺជាទីផ្សារសំខាន់មួយរបស់កម្ពុជា ដែលក្នុងរយៈពេលជាង១០ឆ្នាំចុងក្រោយនេះ ស្ថិតនៅក្នុងចំណោមទីផ្សារទេសចរណ៍សំខាន់ៗទាំង១០របស់កម្ពុជា ។ កំណើននេះអាស្រ័យដោយមានកិច្ចសហប្រតិបត្តិការ និងចំណងសាមគ្គីភាពល្អរវាងប្រទេសទាំង២កម្ពុជា-ជប៉ុន ។ តាមរយៈនេះរាជរដ្ឋាភិបាលសង្ឃឹមថា ក្រុមហ៊ុនទេសចរណ៍ JTB Cambodia នឹងធ្វើការពង្រីក និងពង្រឹងអាជីវកម្មរបស់ខ្លួនតាមរយៈគម្រោងផ្លាស់ប្តូរវប្បធម៌ និងប្រើប្រាស់បទពិសោធន៍ដែលខ្លួនមានកន្លងមក ដើម្បីទាក់ទាញទេសចរជប៉ុន ឱ្យធ្វើដំណើរកម្សាន្តមកកាន់កម្ពុជា កាន់តែច្រើនឡើង ក៏ដូចជាទេសចរកម្ពុជាទៅកាន់ប្រទេសជប៉ុនផងដែរ ។

លោករដ្ឋមន្ត្រី ថោង ខុន បន្ថែមថា ការមកដល់នៃក្រុមហ៊ុនទេសចរណ៍ JTB Cambodia គឺមានន័យថា ជាការមកដល់នៃកំណើនទេសចរជប៉ុនមកកាន់កម្ពុជាបន្ថែមទៀត ដែលស្របតាមការព្យាកររបស់ក្រសួងទេសចរណ៍កម្ពុជា នឹងទទួលបានភ្ញៀវទេសចរអន្តរជាតិចំនួន៧,៨លាននាក់ក្នុងឆ្នាំ២០២០ ។

ជាមួយគ្នានេះ លោករដ្ឋមន្ត្រីបានសម្ដែងនូវសេចក្តីរីករាយ និងអបអរសាទរចំពោះក្រុមហ៊ុនហោះហើរជប៉ុន All Nippon Airway (ANA) ដែលនឹងចាប់ផ្តើមធ្វើការហោះហើរដោយត្រង់ទៅមក តូក្យូ-ភ្នំពេញ-តូក្យូ ជារៀងរាល់ថ្ងៃ ចាប់ពីថ្ងៃទី១ ខែកញ្ញា ឆ្នាំ២០១៦ តទៅ ដោយប្រើប្រភេទយន្តហោះ B787-8 (C42-Y198) ។

លោក គូម៉ាម៉ារុ យ៉ូជិ ឯកអគ្គរាជទូតជប៉ុនប្រចាំកម្ពុជា ថ្លែងថា កម្ពុជាគឺជាប្រទេសទេសចរណ៍មួយក្នុងចំណោមប្រទេសនៅអាស៊ី ដែលមានប្រាសាទអង្គរវត្តជាបេតិកភណ្ឌពិភពលោក ហើយក៏ជាប្រទេសឧស្សាហកម្មទេសចរណ៍អន្តរជាតិមានចំនួនប្រមាណ១៦ភាគរយ នៅក្នុងផលិតផលក្នុងស្រុកសរុប ។ ជាពិសេសប្រាសាទអង្គរវត្តបានឈរលំដាប់លេខរៀងទី១ នៅលើពិភពលោក ដែលទទួលបានការពេញនិយមពីជនជាតិជប៉ុននៅឆ្នាំ២០១៥ ។

លោករដ្ឋមន្ត្រី បានសម្តែងនូវក្តីរំពឹងថា ភ្ញៀវទេសចរជប៉ុននឹងមានកំណើនបន្ថែមទៀត បន្ទាប់ពីការបើកក្រុមហ៊ុនទេសចរណ៍ជប៉ុននៅកម្ពុជា ជាពិសេសការចាប់បើកឱ្យមានជើងហោះហើរផ្ទាល់ពីណារីតា មកទីក្រុងភ្នំពេញ នាខែកញ្ញ ខាងមុខនេះ។

លោក Hiroyuki Takahashi នាយកក្រុមហ៊ុន JTB Group បានឱ្យដឹងថា ក្រុមហ៊ុនទេសចរណ៍ JTB Cambodia គឺជាបុត្រសម្ព័ន្ធរបស់ក្រុមហ៊ុន JTB Group ដោយមានស្នាក់ការធំនៅប្រទេសជប៉ុន និងមានប្រវត្តិជាង១០០ឆ្នាំមកហើយ ក្នុងការបម្រើសេវាកម្មទេសចរណ៍ធំជាងគេនៅក្នុងប្រទេសជប៉ុន និងនៅតាមបណ្តាប្រទេសមួយចំនួនទៀតទាំងនៅក្នុងតំបន់អាស៊ី និងអឺរ៉ុប ។ លោកបន្តថា ដោយមើលឃើញពីកំណើនសេដ្ចកិច្ចកម្ពុជាមានការកើនឡើងយ៉ាងឆាប់រហ័ស និងមានតំបន់ទេសចរណ៍ជាច្រើនទៀតនៅអាស៊ី ដែលជាសក្តានុពលបម្រើឱ្យវិស័យទេសចរណ៍ ជាកត្តាជំរុញឱ្យJTB សម្រេចចិត្តវិនិយោគក្នុងប្រទេសកម្ពុជា ។

លោកនាយកសង្ឃឹមថា ការបម្រើសេវាកម្មទេសចរណ៍នៅកម្ពុជានាពេលនេះ នឹងទទួលបានភាពជោគជ័យ និងជួយរឹតបន្តឹងចំណងមិត្តភាព សាមគ្គីភាពរវាងប្រជាជនកម្ពុជា-ជប៉ុន កាន់តែខ្លាំងឡើងថែមទៀត។

សូមបញ្ជាក់ថា នៅក្នុងឆ្នាំ២០១៥ កម្ពុជាទទួលបានភ្ញៀវទេសចរអន្តរជាតិចំនួន៤,៧៨លាននាក់ កើនឡើង៦ភាគរយបើប្រៀបធៀបនឹងឆ្នាំ២០១៤ ក្នុងនោះទេសចរជប៉ុនមានចំនួន១៩៣.៣៣០នាក់ ស្ថិតក្នុងចំណាត់ថ្នាក់លេខ៧ នាំមកចំណូលជូនជាតិប្រមាណ៣.២០០លានដុល្លារ បង្កើតឱកាសការងារបានជាង៦០ម៉ឺននាក់ ៕